По девет години, бугарскиот претседател, Румен Радев ја напушта претседателската функција.

Уставниот суд денес во земјата ќе одржи расправа за случајот покренат во врска со неговата оставка, јавуваат бугарските медиуми.

Оставката на Радев беше поднесена до Уставниот суд во вторник, еден ден откако тој ја објави својата одлука да се повлече од функцијата и да се кандидира на претстојните предвремени парламентарни избори во специјално обраќање до бугарските граѓани.

Така завршува неговиот речиси децениски престој во „Дондуков“ 2 – прво како претседател во два последователни мандати, а потоа и како клучна фигура во низа политички кризи и привремени влади.

Според Уставот, во случај на предвремено прекинување на претседателскиот мандат, овластувањата на шефот на државата ги презема потпретседателот до истекот на мандатот . По одлуката на Уставниот суд, функцијата ќе ја извршува Илијана Јотова.

Се очекува таа да ја продолжи постапката за назначување на привремена влада, вклучително и спроведување на задолжителните консултации со потенцијалните кандидати за привремен премиер и одредување на датумот за предвремени парламентарни избори, пишува „њуз.бг“.

Според информациите од претседателската институција, Румен Радев официјално ќе ја напушти претседателската зграда денес во 16:00 часот. На свечениот влез ќе го испрати Илијана Јотова, која, по одлуката на Уставниот суд, ќе ги преземе функциите претседател на Република Бугарија.

Претседателот на Украина, Володимир Зеленски, изјави дека клучното прашање за територијата во војната со Русија ќе биде дискутирано на трилатералните разговори во Абу Даби, Обединети Арапски Емирати.

Одговарајќи на новинарско прашање на комуникациската платформа WhatsApp, тој додаде дека во моментов го чека американскиот претседател Доналд Трамп, како и конкретен датум и место за потпишување на финализираниот договор за безбедносни гаранции на САД за Украина.

„Прашањето за Донбас е клучно“, рече украинскиот претседател, осврнувајќи се на украинскиот регион што ги вклучува областите Донецк и Луганск.

Русија објави дека ќе одржи безбедносни разговори со САД и Украина во Абу Даби, предупредувајќи по средбата на претседателот Владимир Путин доцна во ноќта со американските претставници дека траен мир нема да биде можен доколку не се решат територијалните прашања.

Советникот за надворешна политика на Кремљ, Јуриј Ушаков, им изјави на новинарите дека состанокот, кој започна синоќа, непосредно пред полноќ и траеше речиси четири часа, бил корисен и исклучително искрен.

Тој рече дека рускиот адмирал Игор Костјуков ќе ја предводи руската делегација на состанокот во Абу Даби и дека претставникот за економска соработка Кирил Дмитриев ќе одржи посебен состанок за економски прашања со Стив Виткоф, претставникот на претседателот Доналд Трамп. Сепак, на состанокот доцна синоќа беше постигнат мал напредок.

„Најважно е што за време на овој состанок меѓу нашиот претседател и Американците, повторно беше утврдено дека без решавање на територијалното прашање според формулата договорена во Анкориџ, нема надеж за постигнување долгорочен договор“, рече Ушаков, осврнувајќи се на минатогодишниот самит меѓу Трамп и Путин во Алјаска.

Путин нагласи дека Русија е „искрено заинтересирана“ за дипломатско решение, рече Ушаков.

Од руска страна, Путин, Ушаков и Дмитриев учествуваа на состанокот. Од американската страна беа Виткоф, Џаред Кушнер и Џош Груенбаум, кој неодамна беше назначен од претседателот Доналд Трамп за виш советник во Одборот за мир.

фото/Depositphotos

Авионот на руската компанија „Азур Ер“, на летот од Пукет до Барнаул, безбедно слета на аеродромот Ланжоу во Кина, откако испрати сигнал за вонредна состојба за време на летот, пренесуваат медиумите во регионот.

Портпаролот на компанијата објави дека во авионот што непланирано слета во Ланжоу, Кина, имало 238 патници и членови на екипажот и дека сите се неповредени.

Авионот бил на половина пат до Сибир кога бил испратен сигнал за помош во кинескиот воздушен простор.

„Азур Ер“ е руска авиокомпанија со седиште во Москва.