Промените во рускиот устав, вклучително и амандманот што ќе му овозможи на претседателот Владимир Путин да управува со земјата до 2036 година, стапија на сила денеска, откако беа потпишани лично од Путин.

Гласачите со големо мнозинство ги поддржаа уставните измени на гласањето кое заврши во средата. Скоро 78 проценти од гласачите кои учествуваа на референдумот ги поддржаа промените.

Официјален Кремљ резултатот го нарече триумф, додека критичарите го сметаат референдумот за нелегален и нелегитимен. Независните набљувачки мисии оценија дека гласањето во најголем дел било обележано со неправилности.

Организацијата за европска безбедност и соработка не беше набљудувач на референдумот, како што инаку е практика на изборите во Русија.

Европската унија побара од Русија да ги испита тврдењата за нерегуларности во гласањето, вклучително и обвинувања за повеќекратно гласање и принуда.

Покрај тоа што измените во Уставот му овозможуваат на Путин уште два мандата, до 2036 година, доколку тој се кандидира и победи на изборите, со нив исто така сите поранешни руски претседатели добиваат имунитет од судско гонење.

Исто така, според новиот Устав, бракот ќе се дефинира како заедница на маж и жена, рускиот јазик исто така станува уставна категорија, а во текстот се споменува и вербата на Русите во Бога, но земјата и натаму ќе остане секуларна држава.

Забрането е и руска територија да се отстапува на други земји, одредба која аналитичарите ја поврзуваат со анексијата на Крим.

Женка од видот сибирски тигар убила 55-годишна чуварка во зоолошката градина во Цирих, соопштија властите.

Спасувачките екипи не можеле да ѝ помогнат на жената која починала на самото место.

Нападот го пријавил посетител на зоолошката градина, по што персоналот ја намамил тигрицата Ирина да се оддалечи од жртвата и животното се повлекло во своето живеалиште, соопштија од полицијата и администрацијата на зоолошката градина.

Околностите за нападот се истражуваат.

Во истото живеалиште живее и четиригодишен мажјак по име Сајан.

Ирина и натаму останува во зоолошката градина каде дошла пред една година од друга зоолошка, со цел да ја замени женката која угинала по борба со Сајан.

Сè уште не е јасно зошто чуварката и тигрицата биле во затворен простор во исто време, информираат од раководството на зоолошката.

Зоолошката градина во Цирих се отвори пред еден месец откако беше затворена поради коронавирусот.

За неколку години на холандските лични карти веќе нема да се наведува полот на граѓаните, а министерката за образование, култура и наука ја оцени ваквата графа како непотребна.

Во писмо до парламентот, во кое увид имала агенцијата АФП, министерката Ингрид ван Енгелшовен, во чиј ресор се и политиките за еманципација, ја искажува нејзината намера на личните карти од 2024/2025 година да се укине полето за полот на граѓаните.

Министерката сака што е можно повеќе да го ограничи, како што вели, непотребното истакнување на полот, кој сепак и натаму ќе стои во пасошите, што е обврска пропишана од Европската унија.

„Холандија нема да биде прва земја што ќе издаде лични карти во кои не се наведува полот на граѓаните. Во германската лична карта нема категорија пол“, напишала министерката.

Ван Енгелшовен проценува дека жителите мора да бидат во можност да го обликуваат сопствениот идентитет и да живеат во слобода и безбедност.