Властите во Обединетите Арапски Емирати предупредија денес дека можат да воведат ограничувања за луѓето кои не биле вакцинирани против Ковид-19.

Земјата со околу девет милиони жители, која ја прошири кампањата за вакцинација на лица на возраст од 16 години и постари, вакцинираше околу 65 проценти од населението, објави Националната агенција за управување со вонредни состојби на Емиратите (НЦЕМА), пренесува „Ројтерс“.

„Се разгледуваат строги мерки за ограничување на движењето на невакцинирани лица и за спроведување  превентивни мерки, како што е забрана за влез на одредени места и пристап до одредени услуги“, изјави портпаролот на НЦЕМА, Саиф Ал Дахери. „Вашето двоумење денес е пречка за нашите цели, и тоа е нешто што ги става во опасност вашето семејство, најблиски и заедницата.“

Емиратите вчера објавија 1.903 случаи на новозаболени лица, поради што вкупниот број на заболени се искачи на 500.860 случаи, а регистрирани се и 1.559 смртни случаи.

ОАЕ, каде што се задолжителни мерките за социјално дистанцирање и носењето маски на јавно место, е меѓу земјите со најбрзи програми за вакцинација против Ковид-19.

Властите во Абу Даби најавија дека сега покрај кинеската вакцина на „Синофарм“ ќе понудат и вакцина на „Фајзер-Бионтек“. Емиратот Дубаи веќе ја понуди вакцината на „Фајзер“, како и вакцината на „Астразенека“.

Според најновата стратегија за вакцинација издадена од словенечката влада, луѓето кои се заразиле со коронавирус ќе добијат само една доза од вакцината против Ковид-19, додека оние кои се заразиле по првата доза, ќе ја добијат втората доза шест месеци по закрепнувањето.

Според таа стратегија, вакцините сега се достапни за родители на деца од ранливи групи и хронично болни деца.

Во исто време, во Словенија продолжува вакцинацијата на лица над 60 години и хронични пациенти над 18 години. Во употреба се вакцините на три различни производители – „Фајзер“, „Модерна“ и „Астразенека“, кои се даваат во две дози на оние кои не се заразиле со коронавирус.

Државниот циркус во Москва е подготвен да почне со вакцинација на животните за да ги заштити од коронавирусот, веднаш штом властите ги издадат потребните дозволи.

Директорот на циркусот, Едгар Запажњи, најави дека ќе ја промовира оваа акција меѓу неговите колеги и изрази уверување дека Русија ќе биде првата земја во која се вакцинираат животни, јави агенцијата ТАСС.