Италијанската полиција покрена обвиненија за поттикнување самоубиство против 46-годишна инфлуенсерка, по потекло од сицилијанскиот град Сиракуза, пишува интернет-весникот „Фанпејџ“.

Полицијата одговорила откако жената објавила видео на социјалната мрежа „Тик-ток“ во кое таа и уште едно лице ги „предизвикале“ корисниците да ги покријат носот и устата со самолеплива лента, како што направиле и тие двајцата, и со тоа да спречат да дишат па да видат кој може да издржи подолго.

Полицијата оцени дека овој потег е крајно опасен затоа што е достапен на најшироката публика, вклучително и за малолетници кои се големи корисници на мрежата „Тик-ток“.

Во една порака, малолетно момче му кажува на инфлуенсерот дека е подготвен да се фрли низ балконот ако таа го поздрави лично.

Јавното мислење во Италија минатата недела беше шокирано од смртта на десетгодишно девојче од Неапол, кое, учествувајќи во сличен „предизвик“, почина.

Откако полицијата изврши претрес во станот и го одзеде компјутерот на инфлуенсерката, откриени се десетици слични видеопредизвици, кои на жената и овозможија онлајн публика од 750.000 луѓе.

Германскиот министер за здравство, Јенс Шпан, предвидува дека недостигот на вакцини против коронавирус ќе трае до април.

„Претпоставуваме дека недостигот на вакцини ќе трае најмалку уште десет тешки недели“, рече Шпан.

Тој препорача состанок на претставниците на сојузната и покраинските власти со претставници на производителите на вакцини за да се договорат за целите и понатамошните чекори во процесот на вакцинација во Германија.

Во моментов има проблеми со испораката на вакцини од „Фајзер“/ „Бионтек“, но и вакцините од „Астразенека“.

Министерот Шпан моментно е на удар на критики поради тоа што вакцинирањето во Германија не се одвива со посакуваната динамика.

Дневникот „Билд“ недостигот на вакцини го оцени како „скандалозен“ и како главен виновник го наведе Шпан, кој е обвинет од јавноста за правење погрешни тактики при набавката на вакцини.

Строги мерки на затворање се на сила во Германија до средината на февруари. Денеска Институтот „Роберт Кох“ забележа 17.553 нови случаи, околу 3.000 помалку во споредба со една недела претходно.

Германија се подготвува да воведе ограничувања за патниците од Велика Британија, Бразил и Јужна Африка, најави министерот за внатрешни работи, во ситуација кога расте загриженоста поради новите видови на вирусот кои се позаразни.

Водечкиот германски виролог Кристијан Дростен очекува дека светот долго време нема да се врати во „нормалноста“ поради пандемијата.

Тој исто така вели дека не верува во можноста за слободно патување во текот на ова лето.

За јавниот сервис АРД, Дростен предупредува на влошување на епидемиолошката ситуација на пролет.

Тој вели дека по Велигден сè уште нема да има доволно вакцинирани луѓе и предупреди дека ако мерките се олабават тогаш, ќе има ново силно ширење на коронавирусот.

Дростен смета дека се корисни засилените гранични контроли и намалениот обем на воздушниот сообраќај.

„Ако имаме силна инфекција во земјата, тогаш не е многу важно дали се додава нешто однадвор, но ние веќе преминавме голем дел од патот и затоа мора да бидеме внимателни за тоа што доаѓа однадвор“, објасни тој.

Според него, пандемијата не може да се прогласи за поразена.

„Овој вирус не е безопасен. Не може да се претпостави дека веќе се покриени ризичните групи и да се прогласи победа над пандемијата. Потребно е постепено да се релаксираат мерките и секогаш да се анализира како тоа функционира“, подвлекува тој.

Што се однесува до летото 2022 година, Достен е убеден дека ќе изгледа подобро.

„Следното лето, за една и пол година, мислам дека ќе можеме да славиме“, вели тој.