Рускиот министер за надворешни работи Сергеј Лавров денес предупреди дека Русија ќе се „одмазди безмилосно“ ако, како што изјави, „нацистичките сили“ се обидат да се заканат или да го нарушат прославувањето на Денот на победата во Русија.

За време на церемонијата на положување венец во зградата на Министерството за надворешни работи во Москва, Лавров оцени дека современите безбедносни и политички околности во Европа бараат, како што рече, „идеолошка и практична борба против нацизмот“, објави ТАСС.

Тој предупреди на, како што тврди, обидите за „ревидирање на историјата и исходот од Втората светска војна“ и изјави дека во некои европски политички кругови има повици за повторување на историските модели кои, според него, се поврзани со нацистичка Германија.

„Знам дека се одржуваат настани во странство, вклучително и во земји со неповолни услови – Бесмртниот полк во различни формати и други настани кои секоја година го привлекуваат вниманието на земјите домаќини на нашите дипломати кон фактот дека овој подвиг никогаш нема да исчезне од нашето сеќавање. А нацизмот, без разлика во каква форма се прероди, ќе биде поразен“, рече Лавров.

Рускиот министер се осврна и на изјавите на германскиот канцелар Фридрих Мерц за зајакнување на германските вооружени сили и амбицијата повторно да станат најсилни во Европа, и ги оцени како „зачудувачки“.

Тој, исто така, ги критикуваше „пошироките трендови“ во рамките на Европската Унија и западните структури, тврдејќи дека одредени политики во Брисел поттикнуваат „реваншистички тенденции“ и ги влошуваат односите во Европа, пренесува Танјуг.

Зборувајќи за војната во Украина, Лавров го повтори ставот на Москва дека, како што рече, целите се „денацификација“ и отстранување на безбедносните закани од територијата на Украина, со обвинувања дека Западот го користи Киев како инструмент за притисок врз Русија.

Тој заклучи дека Русија ќе одговори на сите безбедносни закани што доаѓаат од украинска територија и повтори дека, според него, „нема да има милост“ за оние што ги загрозуваат руските интереси. „Сакам да кажам со сета искреност и со сета одговорност: ако она што го прават оживеаните нацисти на Запад преку Украина е она што го прават сега, нема да има милост за нив“, нагласи Лавров.

Британскиот премиер Кир Стармер денес изјави дека резултатите од изборите за неговата партија биле „тешки“ и „болни“, но нагласи дека ја презема одговорноста за загубите.

Според досегашните резултати, Лабуристичката партија ја изгуби контролата врз девет локални совети и повеќе од 250 места во советите, иако, како што е наведено, тие бранеа голем број позиции и резултатите сè уште не се комплетни.

Стармер оцени дека гласачите испратиле јасна порака за брзината на промените и потребата од подобрување на животниот стандард, нагласувајќи дека владата мора подобро да одговори на овие очекувања.

„Нема да се откажам од предизвикот“, рече британскиот премиер.

Како што објави Ројтерс, владејачката Лабуристичка партија на британскиот премиер претрпе големи почетни порази на локалните избори во Англија, додека антиимиграциската Реформска партија предводена од Најџел Фараж забележа најголем раст.

Според првите резултати, Лабуристичката партија ја изгуби поддршката во традиционалните упоришта во централна и северна Англија, како и во одредени делови од Лондон, додека Реформската партија освои повеќе од 200 места во локалните совети, пренесуваат медиумите.

Португалски борбени авиони „Ф-16“ пресретнаа руски транспортен авион „Ан-12“ и борбени авиони „Су-35“ над Балтичкото Море. Пресретнувањето се случи како дел од мисијата на НАТО за надзор на воздушниот простор за 2026 година, објави Командата на сојузничките воздухопловни сили, пишува украинскиот воен портал „Милитарни“.

Португалските авиони што учествуваат во мисијата се стационирани во воздухопловната база Амари во Естонија. Од 1 април, португалскиот контингент крена авиони шест пати.

Ова е само најновиот во низата инциденти. На почетокот на мај, борбени авиони на НАТО доделени на мисијата за надзор на воздушниот простор на Балтичкото Море извршија три летови за да идентификуваат и следат руски авиони што летаат кршејќи ги меѓународните прописи.

На 1 мај, борбени авиони „Рафал“ на француското воздухопловство пресретнаа два руски авиони „Су-24М“ што летаа кон и од рускиот регион Калининград. Руските авиони летаа со исклучени транспондери, без поднесен план за лет и без радио контакт со регионалната контрола на воздушниот сообраќај.

Сличен инцидент се случи кон крајот на април, кога шведски и дански борбени авиони пресретнаа руски стратешки бомбардери „Ту-22М3“ придружувани од ловци „Су-35С“ над Балтичкото Море, пренесуваат медиумите.

Во меѓувреме, Словачка објави планови за распоредување на своите борбени авиони „Ф-16“ во мисијата на НАТО за надзор на воздушниот простор над Литванија, Латвија и Естонија до крајот на 2027 година.