Европа
Научници: Летото може да донесе нов бран со новите соеви на омикрон

Новиот летен бран на инфекција со коронавирус и неговото влијание сè уште се неизвесни. Засега е познато дека новите соеви на омикрон BA.4 и BA.5 главно се сметаат за одговорни за зголемувањето на бројот на заразени во неколку европски земји, по Јужна Африка и Португалија, навеле научниците, пренесуваат светските медиуми.
Овие нови подваријанти на омикрон, идентификувани од научниците на почетокот на април во Боцвана и Јужна Африка, според написите, најверојатно се појавиле помеѓу средината на декември и почетокот на јануари.
Во Јужна Африка, „каде што се идентификувани подваријантите BA.4 и BA.5 и каде што инфекцијата со субваријантот BA.4 доминира денес, врвот на епидемискиот бран беше забележан во средината на мај и неговото влијание беше многу умерено. Но, во Португалија, инфекцијата со подваријантата BA.5 сега е распространета, а лекарите велат дека инциденцата се зголемува, но сепак на пониско ниво од претходниот бран“, се вели во резимето на Француската Национална агенција за јавно здравје, објавено во медиумите.
Во последно време, како што било наведено во резимето, забележано е зголемување на бројот на заразени и се повеќе случаи на зарази со новите омикронски субваријанти.
Во Франција, подваријантите BA.4 и BA.5 постепено доминираат, во споредба со BA.2, која доминира таму од почетокот на годината до неодамна, анализираат научниците.
Слична е ситуацијата во Обединетото Кралство и Германија. Експертите велат дека досега не е идентификувана подваријанта BА.3 меѓу заразените.
Портпаролката на француската влада Оливија Грегоар зборувајќи по состанокот на Советот на министри за благото враќање на епидемијата на коронавирус, истакнала дека здравствените власти се „на готовност“ и дека „нема простор за загриженост“ засега.
Последните неделни податоци од француското јавно здравство ја потврдуваат информацијата за зголемен број заразени и за зголемен број на нови подваријанти на омикрон, пренесуваат тамошните медиуми.
Експертите велат дека за ваквиот развој придонесува и олеснувањето на мерките за јавно здравје и посочуваат дека и двете најнови подваријанти на омикрон се чини дека се шират уште побрзо од неговите претходни подваријанти.
Прашањето кое го поставуваат е дали летото, синоним за повеќе активности на отворено, ќе помогне да се спречи потенцијалното ширење на епидемијата?
„Можеме да сметаме на помала инциденца на инфекција во лето отколку во зима, но оваа сезона сама по себе не може да влијае или спречи нов бран на инфекција, а тоа можевме да го видиме во случајот со ширењето на делта сојот на коронавирусот во јули 2021 година, кога имаше четврти бран“, велат епидемиолозите.
Засега нема докази за зголемена загриженост за ширењето на подваријантите BA.4 или BA.5 во споредба со другите омикронски подваријанти, велат француските научници, но додаваат дека е премногу рано за попрецизни податоци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Шолц: Путин не сметаше на ова, a сега го боли глава

Германскиот канцелар Олаф Шолц денеска изјави дека нападите на руската армија врз станбените згради во Киев ја покажуваат неопходноста од меѓународно единство за поддршка на Украина.
Руската армија утринава го гранатираше Киев и погоди најмалку две станбени згради.
Тој го истакна претходното единство на Г7, Европската Унија и НАТО во организирањето поддршка за Украина.
„ Можеме со сигурност да кажеме дека Путин не сметаше на ова и дека сè уште го боли глава поради големата меѓународна поддршка за Украина, но секако и храброста на Украинците во одбраната на земјата“, изјави денеска Шолц, по првата сесија на самитот на Г7.
Нападите врз цивилни објекти, додаде тој, покажуваат дека поддршката на Украинците е правилна одлука.
Германската влада претходно беше критикувана поради неподготвеноста да испрати оружје во Украина. Сепак, Шолц рече дека „Германија и САД секогаш ќе дејствуваат заедно кога станува збор за безбедноста на Украина“.
Тој додаде дека заедно со американскиот претседател Џозеф Бајден биле едногласни за тоа што треба да се направи.
Европа
Зеленски: Ќе ги вратиме сите наши градови

Украина ќе ги врати сите градови што ги зазедоа Русите, вклучително и Северодонец, изјави украинскиот претседател, Володимир Зеленски.
Како што објави претседателот, Украина била погодена од 45 руски проектили во последните 24 часа.
Зеленски ги опиша нападите како циничен обид да се скрши духот на украинскиот народ. Зеленски повторно побара повеќе оружје од Западот, коментирајќи дека немилосрдните ракетни напади потврдиле дека санкциите против Русија не се доволни за да и’ се помогне на Украина.
Северодонецк падна во рацете на руските сили по неколкунеделните борби.
Европа
Лажен Кличко разговарал со градоначалниците на Берлин, Мадрид и Виена

Градоначалниците на Берлин, Виена и Мадрид разговарале во видео повик со личност која звучела и изгледала како градоначалникот на Киев, Виталиј Кличко, но биле измамени.
Европските градоначалници биле измамени при видео повици за кои се покажало дека се лажни, пишува Гардијан. Градоначалничката на Берлин, Франциска Гифеј во петокот учествуваше во закажаниот разговор на платформата за видео конференции Webex со личност за која рече дека изгледала и звучела како Кличко.
„Немаше знаци дека видеоповикот не бил одржан со вистинска личност“, се вели во соопштението од нејзината канцеларија.
Дури по околу 15 минути наводниот градоначалник на Киев почнал да зборува за проблемот со украинските бегалци. Лицето на видеото, кое се претставувало како Кличко, ги повикало бегалците да се вратат во Украина и да се приклучат на војската.
По таа изјава, на градоначалничката на Берлин и’ станало сомнително. Откако врската накратко била прекината, кабинетот на градоначалничката на Берлин контактирал со украинскиот амбасадор во Германија. Тој стапил во контакт со Киев и потврдил дека личноста во видеоповикот не е вистинскиот Кличко, објави Der Spiegel.
Deep fake снимките користат форма на вештачка интелигенција која создава слики од лажни настани или анимации на политичари кои држат лажни говори.
„За жал, реалноста е дека војната се води со сите средства, вклучувајќи го и Интернетот, со цел да се поткопа довербата со дигитални средства и да се дискредитираат партнерите и сојузниците на Украина“, рече Гифеј.
Ист видео повик имаа и градоначалниците на Виена и Мадрид.
Канцеларијата на градоначалникот на Мадрид, Хозе Луис Мартинез-Алмеида, исто така, поднесе пријава во полиција за некој што лажно се претставувал како Кличко во видео повик. Според неговиот портпарол, градоначалникот веднаш по почетокот на разговорот му се посомневал и го прекинал разговорот.
Градоначалникот на Виена, Мајкл Лудвиг, во средата објави на Твитер дека разговарал со Кличко преку видео повик. Твитот беше избришан во саботата. Набргу потоа, на официјалната страна на Виена беше објавено соопштение дека Лудвиг се чини дека бил жртва на „сериозен случај на сајбер криминал“.