На денешната вонредна седница, Парламентот на Црна Гора повторно гласаше со мнозинство гласови за изменување и дополнување на Законот за слобода на вероисповед. За измените и дополнувањата на Законот за вероисповед гласале 41 пратеник од парламентарното мнозинство, без гласови против и воздржани.

Парламентот усвои и други закони што црногорскиот претседател Мило Ѓукановиќ претходно одби да ги потпише и ги врати на повторно изјаснување.

Пакетот закони првпат беше усвоен на седницата на Собранието на крајот на декември минатата година.

Неколку десетици граѓани со знамиња на Црна Гора и НАТО се собраа пред зградата на парламентот.

Опозициските пратеници од редовите на Демократската партија на социјалистите на Мило Ѓукановиќ не присуствуваа на собраниската седница.

Доналд Трамп ја напушти Белата куќа и со тоа му го отстапи местото на новиот претседател на САД, Џо Бајден.

„Го сакам американскиот народ. Ова е збогум, но се надевам дека не е збогум засекогаш“, кратко рече Трамп по излегувањето од Белата куќа во придружба на сопругата Меланија.

На тревникот зад Белата куќа тие беа пречекани од хеликоптер „марин оне“, со кој полетаа во воздухопловната база „Ендрус“.

Таму Трамп ќе го одржи последниот говор како претседател на САД.

Трамп претходно најави дека нема да присуствува на инаугурацијата на Бајден, што ќе се одржи денеска.

Палестинската самоуправа (ПА) вети во вторникот дека законски ќе го гони американскиот амбасадор во Израел, Дејвид Фридман, откако во Ерусалим го призна проектот за населување наречен Градот на Давид, објави новинската агенција „Вафа“.

Во изјавата на Министерството за надворешни работи и иселеници, ПА рече дека целиот Источен Ерусалим е палестинска територија окупирана од 1967 година. Во изјавата се повторува дека „Источен Ерусалим е вечна престолнина на државата Палестина и покрај Фридман и неговата администрација во заминување, која ги прекрши сите законски, дипломатски и етички норми“.

Во изјавата се додава дека фанатичните изјави на Фридман се флагрантно кршење на меѓународното право, меѓународните резолуции и на меѓународните дипломатски традиции.

Министерството истакна дека ќе преземе одговорност да го следи ова прашање со правни експерти и со надлежните власти за да се разговара за можноста Фридман да биде повикан на одговорност пред меѓународните и специјализираните судови.

Во изјавата, ПА го осуди признавањето на Фридман за проектот за населување Градот на Давид, што се случи два дена пред крајот на неговите должности како американски амбасадор во Израел. Фридман во изјавата рече дека Амбасадата на САД го признава Градот на Давид како доказ за американското јудео-христијанско наследство и принципите на основање.

„Признавањето на Фридман е незаконско, неважечко и ги рефлектира неговите намери и неговата мрачна идеологија која тој се обидува да им ги припише не само на својата земја, туку и на американскиот Устав и принципи и да ги примени во корист на израелскиот наратив за Ерусалим,“ се вели во изјавата.