Британскиот министер за надворешни работи, Доминик Раб, денес соопшти дека не било пукано во британскиот разурнувач во Црното Море и дека руското објаснување за инцидентот е предвидливо неточно, а тој исто така ја повика Кина да ги почитува договорите поврзани со Хонг Конг .

Властите во Москва вчера објавија дека руски патролен брод и борбен авион испукале предупредувачки истрели во близина на британскиот разурнувач „Дефендер“, бидејќи наводно влегол во руските територијални води во близина на Крим, што Велика Британија го негира.

„Не е пукано во британскиот разурнувач „Дефендер“, кој минуваше низ украинските територијални води“, изјави Раб пред новинарите за време на посетата на Сингапур, пренесуваат агенциите.

Тој нагласи дека бродот пловел во согласност со меѓународното право, и дека рускиот извештај за настанот е очекувано неточен.

За време на своето обраќање, Раб зборуваше и за неодамнешните настани поврзани со Хонг Конг и апсењето на новинарите на „Епл Дејли“ според законот за национална безбедност и ја повика Кина да ги почитува своите обврски кон независните медиуми во Хонг Конг, во согласност со договорот кој го има со Велика Британија.

„Ние следиме многу внимателно што се случува во врска со затворањето на „Епл Дејли“ и апсењето на новинари и ја повикуваме Кина да ги почитува договорите што слободно ги прифати и веруваме дека станува збор за доверба и е важно за луѓето од Хонг Конг“, рече Раб.

Властите во Хонг Конг претходно објавија дека полициските активности преземени во „Епл Дејли“ не се насочени кон слободата на печатот, а кинеското Министерство за надворешни работи по повод тоа рече дека правата и слободите не можат да бидат пред националната безбедност.

Германската канцеларка Ангела Меркел денес изјави дека Европа е на тенок мраз во борбата против коронавирусот, бидејќи заразниот сој „делта“ се заканува да го поништи напредокот постигнат во намалувањето на инфекциите.

Во обраќањето до парламентот, Меркел рече дека понатамошниот одговор на пандемијата ќе биде главна тема на дискусија на денешниот состанок на лидерите на Европската Унија во Брисел, пренесуваат агенциите.

Таа истакна дека бројот на новозаразени случаи со Ковид-19 во европскиот блок од 27 члена продолжува да опаѓа, додека стапката на вакцинација се зголемува.

“Сепак, иако има причина за надеж, пандемијата не е завршена, особено во сиромашните земји во светот. Но, исто така, во Германија и Европа, ние сè уште се движиме по тенок мраз”, рече Меркел.

“Треба да бидеме претпазливи. Особено новоформираните соеви, особено сега со новиот „делта“ сој, тоа е предупредување за нас да продолжиме да бидеме внимателни”, додаде Меркел.

Во Германија, видот „делта“ сега сочинува околу 15 проценти од новите случаи, според германската агенција за контрола на болести.

Германија инсистира на тоа земјите од ЕУ да договорат единствен став за карантин за патниците кои доаѓаат од области во кои доминантните соеви предзвикуваат голема загриженост. Ова се однесува на Англија, каде што „делта“ сојот, првпат откриен во Индија, веќе ги сочинува повеќето новозаразени случаи.

На Мајами Бич, се урна зграда во среде ноќ според локално време, а Противпожарната служба испрати 80 единици на местото на настанот, беше објавено од нивна страна на Твитер.

Не е познато колку луѓе имало во зградата, но локалните медиуми јавуваат дека под урнатините се слушаат повици за помош.

DEVELOPING: Miami-Dade Fire Rescue responded to a partial building collapse in Surfside, Florida early Thursday morning. It's unclear if there are any injuries or if anyone is trapped at the scene. pic.twitter.com/k0Kfjlc55A

— CBS News (@CBSNews) June 24, 2021

Сè уште не е познато што го предизвикало уривањето на зградата на раскрсницата од 88-та улица и авенијата Колинс, пишуваат агенциите.

Засега нема детални извештаи за жртви, а пожарникарите соопштија дека во тек е операција за спасување.