Украинската армија објави дека убила повеќе од 30.000 руски војници од почетокот на руската инвазија, пишува „Киев Индепендент“.

Тие тврдат дека уништиле 1.330 тенкови, 207 авиони, 174 хеликоптери и повеќе од 500 беспилотни летала.

Овие бројки не се независно потврдени.

These are the indicative estimates of Russia’s combat losses as of May 28, according to the Armed Forces of Ukraine. pic.twitter.com/amu2h8CKK8

— The Kyiv Independent (@KyivIndependent) May 28, 2022

Претседателот на Украина, Володимир Зеленски изјави дека Русија греши ако мисли дека Лиман или Северодоњецк ќе бидат нејзини.

„Донбас ќе биде украински“, рече Зеленски во видео обраќањето. Тој додаде дека дури и ако Русија носи уништување и страдање насекаде, Украина сепак ќе го обнови секој град.

Зеленски оцени дека ситуацијата во Донбас е многу тешка и дека руските сили во најмалку 100 дена војна се обидуваат да ги постигнат целите што се надевале дека ќе ги постигнат во првите денови од конфликтот.

Вашингтон има намера да вклучи ракетни системи со долг дострел во вооружената помош за Украина, објави „Си-Ен-Ен“, повикувајќи се на неименувани официјални извори.

Според нив, американската администрација е подготвена да ги испрати системите како дел од поголем пакет во Киев, кој може да биде објавен следната недела.

Рускиот амбасадор во Вашингтон, Анатолиј Антонов, коментираше дека се надева оти ќе надвладее здравиот разум и дека таквото оружје нема да стигне до Киев.

Американското Министерство за одбрана соопшти дека е „внимателно и свесно“ за барањето на Украина за ракетните системи, но дека „одлуките се уште не се донесени“.