Данска, Грција и Австрија ќе побараат од Европската агенција за лекови (ЕМА) брзо и „небирократско“ одобрување на вакцината на „Астра зенека“, изјави денеска австрискиот канцелар Себастијан Курц.

По разговорите со колегите од кругот на земји кои први презедоа мерки во борбата против коронавирусот, Курц рече дека е договорена заедничка акција со премиерите на Данска и Грција.

„’Астра зенека’ е вакцина што ја развиваат познати експерти, ЕМА ги има сите информации за таа вакцина од 12 јануари. За мене е важно да се залагаме за побрза одлука на ЕМА“, објасни тој.

Курц побара итна, небирократска одлука за одобрување на вакцината.

Тој потсети дека вакцината веќе се користи во Велика Британија и некои други земји.

Тој исто така посочи дека ЕМА требало да одржи седница на крајот на месецот во врска со одлуката за одобрување на вакцината на „Астра зенека“.

„Секој ден е важен за нас. Новиот вид е јасно позаразен, па затоа нè става пред голем предизвик. Секој ден што се добива со побрзо одобрување на вакцината е добиен ден во борбата против коронавирусот”, нагласи тој.

Тој исто така побара да се донесе јасна стратегија за патување во ЕУ, односно влез од таканаречените трети земји.

Во судирите меѓу етничките групи во Западен Дарфур во Судан се убиени 83 лица, објави суданската новинска агенција повикувајќи се на болнички извори.

Борбите во главниот град на државата Ел Генеини започнаа во саботата по кавгата во која еден човек беше прободен до смрт, јави „Би-би-си“. Беше воведен полициски час низ Западен Дарфур, а премиерот Абдалах Хамдок испрати делегација да го испита случајот.

Скоро 100 лица беа повредени во конфликтот кој избувна во близина на бегалски камп. Фаталната расправија меѓу двајцата прерасна во борба меѓу вооружените милиции.

Минатата година беше потпишан мировен договор во кој беа вклучени повеќето, но не сите групи во Дарфур.

Конфликтот во Дарфур започна во 2003 година под претседателство на Омар ал-Башир, кој беше симнат од власт во 2019 година и кој го бара Меѓународниот кривичен суд под обвинение за воени злосторства и геноцид. Милиони луѓе побегнаа, а тензиите остануваат и покрај мировниот процес.

Насилството се случи речиси по три недели откако мировниците од Обединетите нации и Африканската унија ја предадоа безбедноста во рацете на властите во Картум по 13 години.

Највисоките претставници на Европската Унија изразија загриженост по притворањето на рускиот блогер Алексеј Навални, пренесува ТАСС.

„Притворањето на Алексеј Навални по пристигнувањето во Москва е неприфатливо. Ги повикувам руските власти веднаш да го ослободат”, напиша на Твитер претседателот на Европскиот совет, Шарл Мишел.

„Ги замолуваме руските власти за итно ослободување. Подготвени сме да го поканиме Навални во Европскиот парламент”, рече претседателот на Европскиот парламент, Давид Сасоли, во твит.

„Руските власти мораат да ги почитуваат правата на Алексеј Навални и веднаш да го ослободат. Политизацијата на судството е неприфатлива“, повтори високиот претставник на Европската унија за надворешна политика и безбедност, Жозеф Борел.

Ова прашање ќе се дискутира на состанокот на Советот за надворешни работи на ЕУ на 25 јануари и на седницата на Европскиот парламент што започнува на 18 јануари, изјави дипломатски извор во Брисел за ТАСС. Според изворот, земјите од ЕУ може да објават заедничка изјава за ова прашање во понеделник.

Навални, кој беше баран за кршење на условите за условна казна во случајот „Ив Рошер“, беше приведен на московскиот аеродром „Шереметјево“ по пристигнувањето од Берлин во неделата.