Во близина на Москва се урна хеликоптер наменет за транспорт на високи руски функционери, вклучително и Владимир Путин. Ова го пренесуваат „Њусвик“ и „Украинска правда“ а се повикуваат на руската новинска агенција „Интерфакс“.

Се работи за хеликоптер Мил Ми-8 за кој се вели дека паднал на земја со опашката и сечилата на роторот при слетување на меѓународниот аеродром Внуково (околу 25 километри од центарот на Москва). Според последните извештаи, инцидентот се случил во петокот.

На руска страница на „Телеграм“ објавена  е фотографија која би требало да ги покаже последиците од несреќата.

„Според нашите информации, станува збор за Mi-8MTV-1, произведен во 2013 година и дизајниран за 22 патници“, се вели во објавата на Телеграм.

Се претпоставува дека причина за несреќата е грешка на пилотот.

„Кога хеликоптерот слета, пропелерот се фати на земја и го оштети делот од опашката“, изјавил за агенцијата извор од аеродромот.

Како што јави „Аеротајм“ , хеликоптерот припаѓал на одделот за специјални летови „Росија“, кој управува со авиони за транспорт на руски владини претставници. Не е јасно кој бил во хеликоптерот и дали некој е повреден во инцидентот. Од Русија пристигнаа контрадикторни информации . Истрагите на московскиот аеродром Внукова засега остануваат без одговор.

„Аеротајм“  понатаму известува дека хеликоптерите на владината флота се опремени со специјални одбранбени системи и други модификации за безбедно транспортирање на нивните ВИП патници.

Украинската новинска агенција „Украинска правда“ јавува дека се работи за грешка на пилотот. Според Интерфакс, тешкото слетување можело да биде предизвикано од лоши временски услови или дефект на опремата.

Косовскиот премиер Аљбин Курти смета дека европскиот предлог е добра основа за договор со Србија и дека е подготвен да разговара за договорите постигнати во Брисел, но рече дека не добил соодветни аргументи за формирање на Заедницата на српските општини (ЗСО).

Курти рече дека „не смета дека е неопходно да се создаде ЗСО, но оти е подготвен за дискусии за правата на немнозинските заедници“.

Откако го видел француско-германскиот предлог, вели тој, оттогаш преговараат за постигнување договор.

Министерот за надворешни работи на Србија, Ивица Дачиќ претходно денес изјави дека Заедницата на српските општини (ЗСО) останува главната точка на сите договори за Косово и дека таа мора да биде формирана според договорените принципи.

Процесот на прием на Шведска во НАТО е запрен, изјави шефот на шведската дипломатија Тобијас Билстром.

Тој во изјава за „Експресен“ рече дека тоа се случило поради лутата реакција на Турција поради фактот што десничарскиот екстремист Расмус Палудан го запалил Куранот и поради демонстрациите во кои се критикува турскиот претседател Реџеп Таип Ердоган.

Билстром изрази надеж дека на состанокот на министрите за надворешни работи на земјите-членки на НАТО во јули во Литванија ќе биде постигнат договор со Турција.

Ултрадесничарскиот политичар Расмус Палудан го запали Куранот на 21 јануари пред турската амбасада во Стокхолм, а вчера пред турската амбасада во Копенхаген. Тој додаде дека ќе продолжи со ваквите акции се додека Турција не го одобри членството на Шведска во НАТО.

Потегот на Палудан доведе до демонстрации во Турција, како и во голем број други муслимански земји.

Односите меѓу Шведска и Турција се влошија, а турскиот претседател Таип Ердоган рече дека Шведска не треба да смета на турската поддршка за членство во НАТО.

Шведска денеска ги предупреди своите граѓани во Турција да избегнуваат гужви и собири, поради протестите.

„Од Швеѓаните во Турција се бара да го следат развојот на настаните и да избегнуваат големи собири и демонстрации“, објави шведското Министерство за надворешни работи на својата веб-страница во упатствата за своите граѓани во странство.

Најавено е и дека „во наредните денови може да се очекува продолжување на демонстрациите пред амбасадата во Анкара и пред генералниот конзулат во Истанбул“.