Свет
Нордиските и балтичките земји издвојуваат 430 милиони евра за купување оружје за Украина
Министрите за одбрана на Данска, Естонија, Финска, Латвија, Литванија, Норвешка, Шведска и Исланд во заедничка изјава соопштија дека нивните земји ќе издвојат вкупно половина милион долари (430 милиони евра) за купување американско оружје за Украина.
Во заедничка изјава, која беше објавена на веб-страницата на финското Министерство за надворешни работи, по состанокот на министрите на тие земји во Хелсинки, се наведува дека министрите на осумте земји ја потврдуваат својата „посветеност на безбедноста на Украина, што е фундаментално за европската безбедност“, пренесува Укринформ.
„Обединети сме во нашата потрага по одржлив и праведен мир, со целосно почитување на суверенитетот на Украина и легитимните аспирации на нејзиниот народ“, се наведува во соопштението.
Претставниците на осумте земји се обврзаа на одржување долгорочна, предвидлива и координирана воена поддршка за Украина, вклучително и соработка во областа на одбранбената индустрија и зајакнување на способноста на Украина да одговори на идна руска агресија.
„За да ја покажеме нашата поддршка, заеднички одлучивме да придонесеме со пакет од 500 милиони долари за иницијативата „Приоритетна листа на барања на Украина“ (PURL). Оваа иницијатива обезбедува механизам за купување критична одбранбена опрема од Соединетите Американски Држави, директно придонесувајќи кон отпорноста и одбраната на Украина од руска агресија. Ова е еден од многуте начини на кои нашите нации ја поддржуваат Украина“, се вели во соопштението.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп за Иран: Се’ е потпишано, многу сум среќен
Американскиот претседател Доналд Трамп објави дека е потпишан договор со Иран со кој се предвидува целосно отворање на стратешки важниот Ормуски теснец за меѓународната пловидба.
„Многу сум среќен што можам да го кажам ова: Договорот е целосно потпишан. А теснецот, како што знаете, е веќе делумно отворен“, изјави Трамп пред новинарите веднаш по пристигнувањето во Евијан, Франција.
„Во петок ќе биде целосно отворен.“
Според најавите, официјалната церемонија ќе се одржи в петок во Женева, а во име на САД ќе присуствува потпретседателот Џеј Ди Венс.
Со овој договор се продолжува примирјето во траење од 60 дена, во текот на кои треба да се решат најспорните прашања, вклучително и иднината на иранската нуклеарна програма. Трамп нагласи дека евентуалното ублажување на санкциите кон Техеран ќе зависи од натамошното однесување на иранските власти. Веста за потпишувањето на договорот предизвика пад на цените на нафтата на светските берзи, додека вредноста на акциите забележа значителен пораст.
Свет
Трамп: По Иран ќе се фокусирам на Украина
Американскиот претседател, Доналд Трамп, изјави дека по постигнувањето на договорот со Иран, вниманието ќе го насочи кон војната во Украина и состојбата во Либан.
На Самитот на Г7 во Франција, Трамп рече дека неодамна разговарал и со украинскиот претседател Володимир Зеленски и со рускиот претседател, Владимир Путин
„Мислам дека можеме нешто да направиме на тоа поле. Навистина го мислам тоа. Мислам дека и двајцата се отворени за тоа“, изјави Трамп.
Во меѓувреме, Зеленски соопшти дека му предложил средба на Путин со цел да разговараат за завршување на војната, но дека рускиот претседател не бил подготвен за таков разговор.
Прашањето за понатамошната американска поддршка за Украина останува отворено, додека лидерите на Г7 во Франција разговараат и за глобалната економија, снабдувањето со критични минерали и развојот на вештачката интелигенција.
Свет
Трамп пристигна на Самитот во Франција, Макрон не го пречека лично
Американскиот претседател, Доналд Трамп, пристигна на Самитот на Г7 во француското одморалиште Évian-les-Bains, каде што светските лидери ќе разговараат за војната во Украина, економските прашања и неодамнешниот договор меѓу САД и Иран.
Трамп при пристигнувањето не беше лично пречекан од францускиот претседател Емануел Макрон, како што првично било планирано, туку од шефот на претседателскиот протокол. Сепак, двајцата лидери треба да одржат билатерална средба за време на самитот.
Непосредно пред патувањето во Франција, Трамп повторно се закани со воведување царини од 100 проценти за француското вино доколку Париз не го укине данокот за големите американски технолошки компании.
Макрон, пак, порача дека Франција нема да попушти пред таквите закани и оцени дека царините не им користат на земјите од Г7.
На самитот се очекува да биде разгледан и рамковниот договор меѓу САД и Иран за завршување на конфликтот и повторно отворање на Ормутскиот Теснец. Според најавите, меморандумот за разбирање треба да биде потпишан во петок во Швајцарија, додека за повеќе чувствителни прашања, вклучително и иранската нуклеарна програма, ќе следуваат дополнителни технички преговори.
Трамп за време на самитот треба да се сретне и со украинскиот претседател Володимир Зеленски, додека западните сојузници продолжуваат да разговараат за понатамошната поддршка за Украина.
