Свет
Обама ја намали казната за Менинг, за одавање тајни на WikiLeaks

Американскиот претседател на заминување Барак Обама ја намали во вторникот затворската казна на информаторот на WikiLeaks, американскиот војник Бредли Менинг, кому судот во 2015 година му го призна променувањето на полот и името во Челзи Менинг, со што таа ќе биде ослободена во мај, објави Белата куќа.
Во вторникот, три дена пред напуштањето на должноста, Барак Обама ги намали казните за 209 осуденици и помилувал други 64 лица.
Бредли Менинг по изрекувањето на пресудата за шпионажа објави дека се идентификува како жена. Таа во август 2013 година беше осудена на 35 години затвор, бидејќи на разобличувачкиот интернет портал WikiLeaks му предала 700.000 тајни документи за американските војни во Авганистан и во Ирак.
Во ноември 2016 година, Менинг поднесе молба до американскиот претседател Барак Обама да ја намали нејзината казна пред тој да ја напушти Белата куќа, и тогаш рече дека не бара помилување.
„Единственото олеснување кое го барам е да излезам од воен затвор, откако минав шест години во изолација“, напиша Челзи Менинг, според пишувањето на The New York Times.
Менинг, која ја издржува казната во воениот затвор Форт Ливенворт во сојузната држава Канзас, во ќелијата штрајкуваше со глад и двапати се обиде да изврши самоубиство. Нејзината казна истекува на 17-ти мај 2017 година, објави Белата куќа.
Тога Бредли Менинг работел како разузнавачки аналитичар во Багдад во 2010 година кога на WiiLeaks му предал тајни документи и извештаи од боиштето, а материјалот содржеше и видоснимки од нападот на американски воен хеликоптер на наводни бунтовници во Ирак, во кој повеќе десетици беа убиен, вклучително и двајца соработници на агенцијата Reuters.
Документите кои ги предаде Менинг содржат извештаи за инциденти на боиштата во Авганистан и Ирак, досие за затвореници во Гвантанамо и околу 250.000 дипломатски извештаи на американскиот Стејт департмент кои открија меѓу другото и непријатни зајадливи коментари на сметка на многу светски државници,
Три години откако беше уапсен во Багдад, Менинг кон крајот на август 2013 година беше осуден на 35 години затвор.
Во февруари 2015 година беше објавено дека на Менинг, првпат во историјата на американските вооружени сили му е дозволено да се подложи на третман со хормонална терапија за менување на полот, додека беше во затворот во воената база Форт Левенворт. Претходно во април 2014 година, судот на државата Канзас му дозволи да го промени името во Челзи Елизабет. Изјавата на Менинг дека се чувствува жена, сериозно го комплицираше прашањето за неговото затворање, бидејќи во затворот во Форт Левенворт, казните ги издржуваат само мажи. Во март 2015 година, воениот апелационен суд во Вашингтон го призна женскиот пол на Менинг. Покрај тоа, нејзиниот адвокат тврдеше дека досеудената казна далеку ги надминува меѓународните законски норми.
Белата куќа и претходно навести дека може да ја преиначи казната на Менинг, што не е случај и со Едвард Сноуден, поранешниот аналитичар на Агенцијата за национална безбедност (NSA), кој преку британскиот весник The Guardian во 2013 година го откри постоењето на програмите за масовно следење на електронските комуникации милиони луѓе во светот, вклучително и челниците на американските сојузници во Европа. Сноуден на патот од Хонгконг каде и предаде тајните документи на медиумите, кон Латинска Америка, поради блокадите на европските воздухопловни и цивилни власти остана блокиран на аеродромот во Русија, каде што подоцна добива азил за привремен престој.
Основачот на WikiLeaks, Австралиецот Џулијан Асанж кој пет години се крие во еквадорската амбасада во Лондон, за да не биде предаден во Шведска каде е баран по истрага за наводни силувања, и стравува да не биде предаден на САД каде може да му се суди за шпионажа, претходно изјави дека ќе им се предаде на американските власти, доколку Обама ја помилува Менинг.
И Асанж и Сноуден во вторникот вечерта му се заблагодарија на Обама за помилувањето на Менинг, а WikiLeaks објави дека тоа е „победа“.
„Ви благодарам на сите кои ја водевте кампањата за намалување на казната на Челзи Менинг. Вашата храброст и одлучност го направи невозможното можно“, објави Асанж на Twitter.
„Заслужува да се каже со најголема сериозност, со добро срце: Благодарам Обама, објави Сноуден на Twitter. Исто така им се заблагодари на луѓето кои ја водеа кампањата за намалување на казната на Менинг и истакан дека тие придонеле за ваквата одлука./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Татко на едно од децата му попречил на возачот на автобусот, па се превртеле во каналот?

Еден од патниците во автобусот, кој доцна попладнево се преврте во канал на автопатот „Тракија“ во Бугарија, за „bTV“ изјавил дека во автобусот патувале 36 деца и 13 возрасни.
Тие се од Белград и учествувале на фолклорниот фестивал во Сончев Брег.
Според сведокот Наташа Радовановиќ, несреќата се случила откако таткото на едно од децата побарал да седне напред, на седиштето покрај возачот на автобусот, бидејќи не се чувствувал добро.
Во тој момент вниманието на возачот било одвлечено, тој го свртел воланот надесно и автобусот излетал од патот.
Автопатските ленти биле влажни бидејќи непосредно пред несреќата во тој дел врнел силен дожд, пренесуваат бугарските медиуми.
„Еден од родителите во автобусот сакаше да седне на предното седиште до возачот. Се сврте да го отвори седиштето и така се заврте воланот“ – ги пренесува „Нова.бг“ зборовите на Радовановиќ.
Бугарските медиуми јавуваат дека најмалото хоспитализирано дете има 6 години, а највозрасното 17 години.
„Од примените деца, четири се испратени на скенирање. Едно од постарите повредени има сериозна повреда на ногата и најверојатно ќе треба ампутација“ – потврдил директорот на Универзитетската болница во Стара Загора, проф. Јовчо Јовчев.
Регион
Исповед на Светлана Бориловиќ, мајката на монструмот од Цетиње: Подобро што и тој е мртов

Два дена по масакрот во Црна Гора, Светлана Бориловиќ, мајката на Вук Бориловиќ, жителот на Цетиње кој уби десетмина сограѓани не може да поверува дека нејзиниот син во крвавиот пир убил 10 луѓе, меѓу кои и две деца на своите станари, а на крајот и самиот паднал од куршум.
Во изјава за српски „Телеграф“ скршена од болка, таа посочува дека е подобро е тој повеќе да го нема кога веќе направил злодела.
Таа изјави дека Вук имал прекин во филмот и дека направил се несвесен за страшните последици.
Несреќната жена во солзи вели дека ништо не навестувало трагедија и дека нејзиниот син е подготвен да убие дури и еден маж, а камоли десетици возрасни сограѓани и две момчиња, негови станари, кои брутално ги застрелал.
„Без душа сум и не знам дали ќе ја преживеам оваа голгота. Како може ова од моето дете да ми се случи, цел град и држава да го зацрнам?! Зошто, синко, постојано се прашувам, а одговорот никогаш нема да го добијам“ – вели Светлана.
Додава дека Вук не бил проблематичен, дека бил мирен човек кој изгледа „пукнал“ поради малтретирањето на работа.
„Трпеше притисок четири-пет години, а работеше како шеф на обезбедувањето во Националниот парк Ловќен. Ќе признаам, забележав дека е понервозен во последно време, но не правеше проблем. Беше примерен и како татко на семејство и како сосед“ вели таа.
Едвај наоѓајќи зборови, Светлана нагласува дека нејзиниот син не бил во конфликт со ниту една од жртвите.
„Нашите станари Мартиновиќи се вселија пред само два месеци. Тој немал никаков конфликт со главата на тоа семејство, Милош. Мојот син не се тепаше со сопругата или со некој од семејството. Имаше хармоничен брак и прекрасни деца. Сите овие луѓе ги уби во момент на нервен слом, па трагедијата и маките се уште поголеми“ изјави Бориловиќ.
Монструмот од Цетиње, како што го нарекоа медиумите, масакрот го извршил додека, според некои информации, сопругата и децата биле на море (наводно во Херцег Нови), а никој од поширокото семејство не бил сведок како ја напушта куќата со оружје во своите раце.
„Бев на работа. Ме донесоа дома кога се беше готово и кога и тој беше мртов, дури подоцна дознав што се случило, проклета да бидам. Подобро е да го нема кога го изврши злосторството. Никој не може да знае како е мојата внатрешност со оваа болка, која ме направи несреќна“ – заклучила Светлана за српски „Телеграф“.
Таа одбила да каже каде биле на одмор сопругата на Вук, Линда и децата пред една недела, бидејќи полицијата во меѓувреме ја известила јавноста дека неговото семејство не е на територијата на Херцег Нови, како што се наведува во првичните информации.
„Нема да зборувам за тоа. Полицијата може да ме испраша и јас ќе им кажам се што знам, но не можам ништо повеќе јавно да кажам“ изјавила Светлана.
Регион
(Видео) Автобус со деца од Србија се преврте во Бугарија

Автобус со деца од Србија се преврте во канал на автопатот „Тракија“ кај градот Стара Загора, изјави за Нова ТВ, Станимир Станев, заменик главен секретар на бугарското МВР.
Автобусот со српски регистрации, во кој се превезувале 48 деца, излетал на автопатот, а информациите се дека има многу повредени. Според бугарските медиуми, несреќата се случила нешто по 20 часот на 216. км во правец на Софија.
Голем дел од автомобилите што минувале застанале, а на повредените им помогнале десетици луѓе. Според првичните информации 10 деца се тешко повредени.
Децата биле учесници на фестивал во Несебар, јавија српски медиуми.
Полицијата и пожарникарите се на терен, а сообраќајот на овој дел од автопатот е ограничен.
Децата од Србија се враќале од одмор на бугарското крајбрежје.
Засега нема информации за загинати, јавуваат локалните медиуми, повикувајќи се на полициски информации.