Претседателот на партијата „Форца Италија“, Силвио Берлускони, како што објави весникот „Ла Стампа“, изјавил дека руската вакцина „спутник В“ функционира одлично и дека Италија треба да ја купи таа вакцина на слободниот пазар.

Берлускони не е единствениот кој инсистира да се бараат вакцини на друга страна, бидејќи системот за набавки на Европската Унија, Ковакс досега покажа сериозни недостатоци, а поради еднострано намалување на испораките го загрозува и националниот план за вакцинација во Италија.

Лидерот на партијата „Лига“, Матео Салвини, исто така, бара од владата на премиерот Марио Драги да го следи примерот на другите земји од ЕУ, како што се Австрија, Унгарија, Данска и Словачка, кои веќе донесоа одлука за купување на руска вакцина.

Засега, во Италија се користат вакцините на Модерна, Астра зенека и Бионтек, чија испорака е договорена преку единствена програма на ЕУ.

Производителите на овие вакцини однапред добија пари за истражување и производство на лекот, но трет месец по ред еднострано ја намалија испораката на договорените количини вакцини.

Во Италија, која има 62 милиони жители, досега се вакцинирани околу 4,4 милиони луѓе.

Оној кој е вакциниран нема можност да избере со која вакцина ќе биде имунизиран.

Властите во Италија потсетуваат дека руската вакцина „спутник В“ сè уште не добила одобрение за употреба од Европската агенција за контрола на лекови ЕМА.

Но, Матео Салвини инсистира на тоа да не се чека одобрување од Агенцијата, затоа што здравјето на Италијанците е во прашање.

Поранешниот претседател на Франција, Никола Саркози, изјави дека е подготвен да побара правда од Европскиот суд за човекови права, како и дека ќе ја докаже својата невиност.

Ова е прва реакција на Саркози во јавноста откако беше осуден за корупција.

„Се жалев на пресудата, можеби дури и ќе треба да го изнесам ова прашање пред Европскиот суд за човекови права”, изјави Саркози за весникот „Фигаро”.

Тој рече дека ќе му биде болно да ја тужи сопствената држава.

„Но, јас сум подготвен на тоа, бидејќи тоа ќе биде цената на демократијата“, рече Саркози, додавајќи дека нема да се кандидира за претседател во 2022 година, но ќе поддржи некој кандидат во догледно време

Германската канцеларка, Ангела Меркел, и регионалните лидери се блиску до договор за постепено ублажување на ограничувањата поради коронавирусот, пренесува „Ројтерс“.

Агенцијата наведува дека властите во Германија подготвуваат одлука за постепено олеснување на епидемиолошките мерки на денешната средба, но дека правилата може повторно да се заострат доколку бројот на инфекции со Ковид-19 почне да се зголемува.

Според новиот план на владата, од 8 март на исто место ќе може да се соберат најмногу пет лица од две домаќинства, освен деца на возраст под 14 години, а исто така од тој датум ќе може да се отворат и цвеќарници, книжарници, градинарски центри, како и салони за услуги и за нега, пренесува „Ројтерс“.