ЕУ смета дека референдумите за приклучување кон Русија организирани во украинските региони се „нелегални“ и сите лица кои учествувале во нивната организација ќе бидат казнети, изјави портпаролот на шефот на европската дипломатија, Жозеп Борел.

„Сите лица кои учествуваа во организирањето на тие нелегални референдуми и кои ги поддржаа ќе ги сносат последиците“, изјави портпаролот на Борел, Петер Стано на редовната дневна прес-конференција во Брисел.

Европската унија подготвува нови економски и индивидуални санкции против Русија, а на листата ќе бидат додадени и лица кои јасно се вклучени во тие референдуми, изјави денеска во обраќањето пред Европскиот парламент еден од соработниците на Борел, Лук-Пјер Девињ.

„Секоја поддршка за тие незаконски референдуми е незаконска. Се зависи од вклученоста во таа поддршка“, рече Стано и додаде дека земјите-членки на ЕУ ќе утврдат дали активностите на тие лица се предмет на санкции и дали има причини да се воведат санкции за нив.

За воведување нови санкции потребна е едногласна одлука на европските дваесет и седум земји.

ЕУ веќе воведе санкции против Москва, вклучително и суспендирање на купување јаглен и нафта. Таа, исто така, стави повеќе од илјада Руси, вклучително и претседателот Владимир Путин и бројни олигарси, на црната листа на лица на кои им е забранет влезот во Унијата, потсетуваат медиумите во регионот.

Рускиот претседател Владимир Путин денеска најави дека жетвата на жито во Русија ќе достигне рекордно ниво и оцени дека санкциите за извоз на руско жито и ѓубрива може да доведат до глобална прехранбена криза, за што, како што вели, виновен е колективниот Запад.

„Продолжуваме да се соочуваме со тешкотии во извозот на житарки и ѓубрива, што е за жалење и за нас и за глобалниот пазар на храна“, рече Путин, пренесува ТАСС.

Според него, „санкциите против Русија се закануваат дополнително да ја влошат ситуацијата, што ќе доведе до глобална прехранбена криза кон која светот се движи веќе неколку години“.

„Тоа нема никаква врска со руската специјална воена операција во Донбас. Тоа е резултат на финансиската и прехранбената политика усвоена од некои водечки земји. Таканаречениот колективен Запад секако е целосно виновен за тоа“, додаде Путин.

Рускиот претседател изјави и дека жетвата на жито во земјата оваа година би можела да достигне рекордни 150 милиони тони, вклучувајќи 100 милиони тони пченица.

„Според експертите, жетвата на жито би можела да изнесува 150 милиони тони. Рековме прво 140 милиони тони, подоцна 145, па 147, а сега прелиминарната проценка е 150 милиони тони и околу 100 милиони тони пченица, што ќе биде рекорден резултат“, нагласи Путин.

Бакингемската палата го претстави монограмот на кралот Чарлс Трети, кој ќе се користи во државните институции, на официјални документи и поштенски сандачиња.

Монограмот го избрал лично новиот крал меѓу неколкуте примероци направени од Колеџот за оружје, јавува Би-би-си.

Монограмот е комбинација од иницијалите „Ц“ и „Р“ како почетна буква за „Рекс“ што е латинска ознака за владетелот, заедно со римскиот број III бидејќи тоа е третиот крал Чарлс.

Овој монограм, кој исто така ќе се смета за визуелен идентитет на новото владеење, ќе ја замени поранешната ознака E II R која беше симбол за неодамна починатата кралица Елизабета Втора.

Во исто време, Централната банка на Англија денеска објави дека до крајот на годината ќе бидат воведени полимерни банкноти со ликот на кралот Чарлс III, додека банкнотите со ликот на неодамна починатата кралица Елизабета Втора ќе продолжат да бидат во оптек.

Примената на монограмот на новиот британски монарх започнува пред крајот на периодот на жалост, а првата употреба ќе биде веќе денес во Бакингемската палата при пишување писма.

Монограмот ќе има поширока примена, а ќе биде видлив на униформите, официјалните институции, а има и специјална верзија на монограмот за Шкотска која ја содржи шкотската круна, пренесе Телеграф.рс.