Британскиот премиер Борис Џонсон има намера да го врати договорот за Брегзит во парламентот пред Божик, изјави денеска заменикот-министер за финансии Риши Сунак, додавајќи дека владата потоа ќе го претстави и новиот буџет.

„Најважната работа во овој нов мандат е да се заврши Брегзит … Ние ќе ја напуштиме Европската унија за неколку недели, до крајот на јануари. Нашата намера е да го донесеме Предлог-законот за повлекување пред парламентот пред Божик“, рече Сунак за Би-Би-Си.

Говорејќи за ветувањата на премиерот Џонсон дека владата ќе го зголеми финансирањето за Националната здравствена служба на Велика Британија, Сунак рече дека Британците се согласни оти тоа е приоритет, пренесува „Ројтерс“.

Лидерот на британските лабуристи Џереми Корбин им се извини на приврзаниците заради големите загуби на неговата партија на изборите.

Тој го призна неуспехот на партијата на изборите и ја прифати својата одговорност за тоа.

„Резултатот е тежок удар за секој на кого очајнички му беше потребна вистинска промена во нашата земја. Жал ми е што потфрливме и јас ја преземам одговорноста за тоа“ напиша Корбин во отвореното писмо до „Мирор“, пренесе Би-Би-Си.

Конзервативците на премиерот Борис Џонсон осовија убедливо мнозинство на општите избори во четвртокот, и тоа е нивната најголемата победа во последните 30 години, потиснувајќи ги лабуристите дури и од нивните традиционални упоришта. Спротивно на нив, лабуристите го доживеаја најголемиот пораз од 1935 година.

Прелиминарните разговори за избор на нов лидер на партијата најверојатно ќе почнат идната недела, а Корбин својата одлука за заминување ќе ја донесе на специјална седница на почетокот на јануари.

Околу 54.000 луѓе се евакуирани од италијанскиот град Бриндизи поради деактивирање на бомба во Втората светска војна, соопштија локалните власти.

Бомбата била случајно откриена за време на реновирање на театар.

Весникот „Кориере дел Сера“ објави дека операцијата за евакуација е најголемата извршена во Италија, во период на мир во земјата, при што повеќе од 60 проценти од жителите на Бриндизи мораа да ги напуштат домовите на растојание од 1.617 метри од локацијата каде е пронајдена бомбата.

Британската бомба, за која се верува дека е фрлена на градот во 1941 година, е долга еден метар и содржи 40 килограми динамит, соопштија градските власти.