Воен авион на НАТО денес собори дрон во Естонија, за кој се верува дека е лансиран од Украина, изјави естонскиот министер за одбрана Хано Певкур.

Во интервју за порталот „Делфи њуз“, Певкур потсети дека ова е последното во низата повреди на воздушниот простор во земјите што граничат со Русија, објавува Ројтерс.

Од март, неколку украински воени дронови залутаа во воздушниот простор на земјите-членки на НАТО: Финска, Латвија, Литванија и Естонија.

Сите овие земји граничат со Русија, а латвиската влада поднесе оставка минатата недела поради начинот на кој се справуваше со слични ситуации.

Досега никој од седиштето на НАТО не одговори на барањето на Ројтерс за коментар, пренесува медиумот.

Германија внимателно ја следи посетата на рускиот претседател Владимир Путин на Кина, но во Берлин не очекуваат дека тоа ќе донесе фундаментална промена во односите меѓу Москва и Пекинг, изјави германскиот канцелар Фридрих Мерц.

На заедничката прес-конференција со швајцарскиот претседател Ги Пармелин во Берлин, тој рече дека германските власти го анализираат не само престојот на Путин во Пекинг, туку и пораките претходно разменети за време на средбата меѓу кинескиот претседател Шји Џјинпинг и американскиот претседател Доналд Трамп.

„Секако, многу внимателно ја следиме посетата на претседателот Путин на Пекинг“, рече Мерц, додавајќи дека Берлин ги следи и „различните изјави дадени на средбата меѓу кинескиот претседател Џјинпинг и американскиот претседател Трамп“.

Според него, Германија сè уште не гледа никакви знаци дека руската посета на Кина би можела да ги промени темелите на кинеско-руското партнерство.

„Во моментов, не очекуваме фундаментална промена во стратешките односи меѓу Русија и Кина“, истакна германскиот канцелар.
Во исто време, Мерц изјави дека Берлин се надева дека Пекинг би можел да го искористи своето влијание врз Москва за да придонесе за завршување на конфликтот во Украина.

Посетата на Путин на Кина се следи со посебно внимание во западните престолнини, бидејќи во последните години Москва и Пекинг сè повеќе отворено ги претставуваат своите односи како еден од столбовите на новиот глобален поредок.

Според извештаите од светските агенции, рускиот претседател пред патувањето изјавил дека Русија и Кина се подготвени да се поддржуваат меѓусебно во прашањата за суверенитет, безбедност и меѓународна стабилност.

Кина, од друга страна, е изложена на постојани повици од Западот да изврши притисок врз Русија поради војната во Украина, но во исто време, Пекинг се обидува да одржи простор за односи и со Москва и со западните центри на моќ.

Фото: ЕПА

Преставникот на руската државна дума од регионот Новосибирск и член на Комунистичката партија на Руската Федерација, Ренат Сулејманов, изјави дека Русија мора „што поскоро да ја заврши специјалната воена операција во Украина“, бидејќи руската економија „нема да преживее долгорочна специјална воена операција“.

Сулејманов го изјави ова во интервју за порталот од Новосибирск, Континент Сибири. Според него, дури 40 проценти од федералниот буџет оди за одбрана и безбедност, што го попречува развојот и инвестициите.

„Тенковите и гранатите немаат потрошувачка вредност: економијата ги произведува, но населението не може да ги користи. Тоа се чисти трошоци. Да, тие ја одржуваат вработеноста и платите во одбранбениот сектор и служат како еден вид двигател на економијата. Но, во исто време, тие ја стимулираат инфлацијата и ги истиснуваат другите потробувања, општествената потрошувачка и инвестициите“, предупреди тој, пренесува Медуза.

„Проблемите нема да станат помали“
„Затоа брзото завршување на специјалната воена операција е едноставно неопходно. Специјалната воена операција веќе траеше подолго од Втората светска војна. Ако даде Бог, ќе заврши со победа, а не со некое полурешение“, додаде тој.

Тој истакна дека донесувањето буџет со намалени воени трошоци „нема да биде ни блиску до најтешкиот дел од проблемот“. „Што ќе се случи со луѓето вработени во одбранбената индустрија? Со сите што сега се под оружје? Милион луѓе ќе се вратат во цивилен живот. Каде се работните места, пристојните плати и социјалната реинтеграција? Проблемите нема да станат помали“, предвидува Сулејманов.

„Со ова доаѓа и прашањето за обнова на нови територии. Го видов Мариупол во 2022 година и Херсонската област во 2023 година. Нема повеќе куќи, нема советски систем за наводнување. Реконструкцијата започна, но ќе бара огромни буџетски трошоци во иднина“, истакна тој.