Вселенскиот патријарх Вартоломеј денеска изјави дека Руската православна црква ги предала отците на православната црква поддржувајќи го нападот врз Украина.

Рускиот патријарх Кирил ја поддржа акцијата во Москва и неговата позиција се прошири низ Православната Црква.

Светскиот совет на црквите побара од патријархот Кирил да „интервенира и посредува“ за запирање на војната, објави „Ројтерс“.

Во интервју за грчката државна телевизија ЕРТ, Ватроломеи рече дека очекува Кирил да се спротивстави на одлуката на рускиот претседател Владимир Путин да ја нападне Украина и да поднесе оставка, доколку е потребно.

„ Не е невозможно сите цркви да не го осудуваат насилството, војната. Руската црква нѐ разочара. Не сакав Руската црква и братот патријарх Кирил да бидат овој трагичен исклучок. Не знам како може да се оправда пред својата совест“, рече Вартоломеј.

Тој додаде дека очекува Кирил да застане во клучниот, историски момент и ако треба да ја жртвува својата позиција, па да му каже на Путин „Господине претседателе, не се согласувам со вас, поднесувам оставка“.

Украинскиот министер за надворешни работи Дмитри Кулеба ја обвини Русија дека се обидува да го уценува светот.

Тој истакна дека Русија е подготвена да ги деблокира пристаништата на Црното Море, доколку ѝ бидат укинати санкциите.

Кулеба на Твитер изјави дека секој што размислува да ја прифати „оваа игра“ прво треба да ги посети „гробовите на убиените украински деца и да разговара со нивните родители“, пренесува британски „Гардијан“.

Претходно денеска рускиот заменик министер за надворешни работи Андреј Руденко изјави дека Русија е подготвена да обезбеди хуманитарен коридор за бродовите кои превезуваат храна од Украина, во замена за укинување на санкциите, пренесе „Интерфакс“.

Украинските пристаништа на Црното Море се блокирани откако Русија започна воена операција во Украина на 24 февруари, а повеќе од 20 милиони тони жито се заглавени во силоси во Украина.

Германскиот министер за здравство Карл Лаутербах денеска изјави дека владата планира да ги укине епидемиолошките правила во текот на летото, според кои на патниците за влез во Германија им треба потврда за вакцинација против Ковид-19, негативен резултат од тестот или доказ за прележан ковид.

Лаутербах изјави за медиумската група „Функе“ дека правилата што важат за сите луѓе постари од 12 години, без разлика од каде доаѓаат во Германија, ќе бидат суспендирани од 1 јуни до крајот на август, пренесува АП.

Од почетокот на март Германија повеќе нема список на „зони со висок ризик“.

Бројот на нови случаи на коронавирус во Германија постојано се намалува, а повеќето рестриктивни мерки се укинати. Сепак, владата најави дека ќе обезбеди дополнителни 830 милиони евра за набавка на вакцини кои ќе помогнат да се сузбијат можните варијанти на коронавирусот наесен.