Црногорски државјанин на возраст од 41 година, идентификуван како Марко В. бил брутално ликвидиран синоќа во Нов Белград, пренесе хрватски „Индекс“.

Во моментот кога вооружениот напаѓач ги испукал кон него смртоносните истрели, тој седел во автомобил со сопругата и чекал децата да излезат од училиште, изјавиле за „Блиц“ жители на зградите од соседството каде се случило убиството.

Црногорскиот поморец со семејството неодамна дошол од странство во Србија. Тој немал досие, но српската полиција го имала запишано неговото име во оперативни документи, според кои се работи за лице од криминалните кругови.

Локалните жители биле особено згрозени што човекот бил убиен пред очите на жената и децата.

„Има многу криминалци во нашето соседство, така што не ме чуди оваа ликвидација. Сепак, страшно е што човекот го убија пред жената и децата“, изјавил еден од станарите на зграда во близина на местото на убиството.

„Неговата сопруга еден час по убиството хистерично викаше да дојде брза помош, иако лекарите веќе дојдоа и одамна констатираа смрт. Жената беше во сериозен шок”, рекла жена која била во близина на местото на убиството еден час по трагичниот настан.

Повеќе од 150 луѓе се повредени во денешните протести во Бејрут, во кои безбедносните сили пукале со солзавец во билизина на зградата на Парламентот и употребиле водени топови за да растераат илјадници демонстранти.

Над тој дел од градот се кренал густ облак од чад, пренесуваат светските агенции.

Немирите избиле кога некои демонстранти започнале да фрлаат со камења кон полицијата во близина на Парламентот, додека други ги кршеле сообраќајните знаци и металните бариери, фрлајќи парчиња железо кон безбедносните сили.

Некои од учесниците ги гаѓале полицајците и со петрди, пренесува АП, додека пак „Ројтерс“ соопшти дека демонстрантите биле „вооружени“ со гранки и сообраќајни знаци.

Либанскиот Црвен крст информира дека повеќе од 60 лица добиле лекарска помош, додека најмалку 40 биле пренесени во болница.

Претседателот на Либан, Мишел Аун, ги повика командантите на воените и безбедносните сили да го вратат мирот во Бејрут, по судирот со демонстрантите.

Аун повика и на заштита на мирните демонстранти, како и на јавниот и приватниот имот во главниот град, се вели во соопштението од претседателскиот кабинет.

Во Либан веќе три месеци се одржуваат протести против политичките елити кои владеат со земјата од крајот на граѓанската војна, од 1975 до 1990 година, при што демонстрантите ги обвинуваат политичарите за широко распространета корупција и лошо управување.

Над 30 луѓе се убиени денеска во напад на бунтовниците Хути врз центар за обука во Јемен, објави државната телевизија на Саудиска Арбија, „Ал Акбарија“.

Телевизиjaта пренесе изјави од медицински извори според кои во нападот загинале 32 војници, информира агенцијата „Ројтерс“.

Веќе неколку години Јемен е зафатен од вооружен судир меѓу владините сили, предводени од претседателот Абдрабух Мансур Хади и бунтовниците Хути.

Коалицијата предводена од Саудиска Арабија, на барање на Хади, од 2015 година изведува воздушни напади против бунтовниците, поддржани од Иран.