Триесет примероци на коронавирусот од Косово пристигнаа денес во Берлин, а резултатите од лабораторискиот тест се очекуваат за две недели. Тестовите ќе покажат дали содржат нов вид коронавирус.

Косовските инфектолози се сомневаат дека новиот вид коронавирус пристигнал на територијата на Косово, пренесува „Газета експрес“.

Специјалистот за инфективни болести, Хамди Рамадани, изјави дека Светската здравствена организација објави оти новиот вид се проширил во 60 земји и дека поминала речиси една година од првиот случај на корона во Косово, па не е исклучено да се појави мутирана форма на вирусот.

Според него, оваа нова форма на мутација може да биде иста како онаа во Британија, но може да биде и друга форма на вирус.

Директорот на одделот за микробиологија, Џеват Јакупи, рече дека во Косово нема лабораториски услови за откривање нов вид коронавирус, па затоа повеќе примероци ќе бидат испратени во Берлин следниот месец.

Во последните 24 часа во Србија биле тестирани 10.240 лица на коронавирусот, од кои 1.648 биле позитивни, а починале 20 лица.

Според последните податоци на Министерството за здравство и Институтот „Батут“, во болниците во Србија има 166 пациенти на апарати за дишење.

Досегашните корона-рекорди се: најмногу позитивни за еден ден – 7.999, најмногу луѓе на апарати за дишење – 353, најмногу тестирани – 22.837 и најмногу починати – 69.

Одлуката за тоа како ќе продолжи процесот на судење на поранешниот претседател на САД, Доналд Трамп, новиот американски претседател Џо Бајден ќе му ја препушти на Сенатот, соопшти портпаролот на Белата куќа, Џен Псаки.

„Убедени сме дека Сенатот може да ја исполни својата уставна должност додека работи за американскиот народ. Претседателот Бајден ќе им ги остави механизмите, временската рамка и другите детали за тоа како Конгресот ќе го продолжи процесот на отповикување“, рече Псаки на брифингот за печатот во Белата куќа.

Претседателот на Претставничкиот дом, Ненеси Пелоси, сè уште не го испратила текстот за отповикувањето до Сенатот, а според правилата на тоа тело, судењето на поранешниот претседател ќе почне ден по приемот на одлуката за отповикување.

Бајден претходно ги повика сенаторите да не дозволуваат судењето во Трамп да ги забави преостанатите активности во првите денови од неговиот мандат, како што се гласање за неговата администрација и донесување закони.