Словачкиот министер за здравство, Марек Крајчи, ја одобри употребата на руската вакцина „спутник В“ за борба против коронавирусот, објави ресорното Министерство на својата веб-страница и потенцира дека употребата на вакцината е дозволена до крајот на август.

Вакцината ќе се користи во Словачка во согласност со статусот на исклучок што ѝ го додели Министерството за здравство како нерегистриран лек.

Луѓето што се заинтересирани да се вакцинираат со „спутник В“ ќе мора да дадат писмена согласност за да потврдат дека се свесни за фактот дека Европската агенција за лекови засега не ја одобрила оваа вакцина, пренесува ТАСР.

Вакцинацијата ќе се одвива на доброволна основа и нема да биде ограничена од возраста на примателот. Крајчи истакна дека „спутник В“ е веќе регистрирана во одреден број земји.

Словачкиот премиер Игор Матович во понеделникот објави дека Словачка ќе нарача два милиона дози од руската вакцина „спутник В“.

Германија планира да го продолжи карантинот до 28 март, но некои мерки ќе бидат олеснети од 8 март.

Според нацрт-законот до кој дојде интернет-порталот „Фокус онлајн“, постигнат е договор меѓу канцеларката Ангела Меркел и премиерите на 16 германски провинции, објави „Ројтерс“.

Меркел ќе разговара со премиерите на германските покраини утре бидејќи бројот на заболени од Ковид-19 од почетокот на пандемијата надмина 2,4 милиона.

Лидерот на Социјалдемократската партија на Германија, Норберт Валтер-Борјанс, ги обвини германската канцеларка Ангела Меркел и министрите од ЦДУ за лошо управување со кризата предизвикана од коронавирусот.

Валтер-Борјанс изјави дека Германија има шеф на владата кој има направено многубројни пропусти во координирањето со кризата.

Тој рече дека министрите од коалицискиот партнер на СПД не ги исполнуваат своите обврски.

Во исто време ги пофали социјалдемократските членови на владата, како што е вицеканцеларот Олаф Шолц, за кого Валтер-Борјанс тврди дека ги поправа сите проблеми.

Тој вели дека придонесот на членовите на владата од редовите на ЦДУ и ЦСУ е далеку зад оние од редовите на СПД.