Противниците на абортусот протестираат во Вашингтон

Охрабрени од постапките на американскиот претседател Доналд Трамп, илјадници противници на абортусот започнаа во петокот да се собираат во сојузната престолнина Вашингтон, сакајќи да ја покажат сојата сила во новите политички состојби во САД коишто им одат во полза на нивните настојувања.

„Се надеваме дека ќе бидат донесени закони за заштита на неродените деца, закони коишто ќе водат сметка за сите жени кои минуваат низ бременоста, а не знаат кому да у се обратат и не знаат дека постојат и други можности, освен абортусот“, изјавила за AFP Керол Бракен, учесничка на собирот.

Таа е 57-годишна учителка од американската сојузна држава Конектикат којашто во Вашингтон допатувала со транспарентот на кој пишувало „Абортусот го прекинува отчукувањето на едно срце и го парчосува другото“.

Учесниците коишто допатувале од сите делови на САД, се подготвуваат во поворка да прошетаат од Белата куќа до Врховниот суд, двете институции од кои многу очекуваат.

Пред тоа ќе го сослушаат говорот на американскиот потпретседател Мајк Пенс, којшто, како што мислат, ќе го означи ова „Поворка за живот“, годишен собир кој многумина го сметаат за најголемото светско собирање против абортусот.

„Поворката за живот“ се одржува шест дена по „Поврата на жените“, на којашто според медиумите во Вашингтон учествувале половина милион жени и мажи кои протестираа против новиот претседател Доналд Трамп.

Трамп изјави дека противниците на абортусот би можело бројно да ги надминат оние кои се обидоа да ја попречат и засенат неговата инаугурација којашто се одржа претходниот ден.

Оваа 44-та „Поворка за живот“ се одржува во прилики кои се наклонети на ткн „Про-лајф“ движењето, како што се нарекуваат противниците на намерното прекинување на бременоста.

Поборниците на ова движење во понеделникот добија гаранции од американскиот претседател кој меѓу своите први извршни укази ја потпиша забраната за американското финансирање на меѓународните невладини организации кои го поддржуваат абортусот

Од говорницата на учесниците на маршот во петокот ќе се обратат и републикански пратеници, њујоршкиот кардинал Тимоти Долан и Келијан Конвеј, влијателна советничкана новиот претседател и мајка на семејство воспитувано во католичката вера.

Поворката којашто започна да се формира во близинана Националниот споменик, јужно од Белата куќа се упатуваат до возвишувањето Капитол Хил. На учесниците таму ќе им биде упатен повик да извршат притисок на своите претставници во Конгресот во кој републиканците имаат стабилно мнозинство.

Медиумите во САД истакнуваат дека активистите на движењето „За живот“ наскоро би можеле да имаат дополнителна причина за задоволство. Имено, Доналд Траммп на 2-ри февруари како деветти член на Уставниот суд ќе именува судија кој вети дека ќе го избира меѓу противниците на абортусот./крај/мф/сн