Американскиот државен секретар, Мајк Помпео, денеска изјави дека, иако Иран несомнено е одговорен за минатонеделните напади врз два танкери на нафта, САД не сакаат војна со Техеран.

„Претседателот Трамп направи сè за да избегне војна. Ние не сакаме војна“, изјави Помпео во интервју за телевизијата „Фокс“.

Тензиите меѓу САД и Иран го достигнаа врвот откако администрацијата на Доналд Трамп го обвини Техеран дека во четвртокот изврши напад врз два танкери за нафта во Оманскиот залив. Иран отфрла одговорност за нападот.

Помпео додаде дека не сака да зборува за идните потези на Вашингтон.

Запрашан дали САД ќе испратат повеќе војници и оружје во регионот, тој рече дека Иран има за цел да нема нуклеарно оружје.

Сопругата на премиерот на Израел, Бенјамин Нетанјаху, Сара Нетанјаху, е казнета со 15.000 долари за злоупотреба на државни фондови.

Судот во Ерусалим ја прифати спогодбата што Сара ја постигнала со обвинителството откако признала дека злоупотребила 100.000 долари државни пари за скапа храна во ресторани.

Канцеларијата на државниот обвинител сопшти дека сопругата на премиерот ќе плати дополнителна казна за да се затвори случајот во кој е обвинета дека нарачувала храна од луксузен ресторан иако во резиденцијата имало вработено готвач.

Нетанјаху, пак, е соочен со можни обвиненија за одвоени случаи на корупција.

Британскиот министер за внатрешни работи, Сајид Џавид, го потпиша налогот за екстрадиција на основачот на „Викиликс“, Џулијан Асанж, на САД, каде што е обвинет за хакирање и незаконско објавување доверливи документи.

Џавид рекол дека на барање на САД, тој го потпишал налогот за екстрадиција и дека денеска ќе биде испратен до судот.

Асанж се соочува со 18 обвиненија во САД, меѓу кои обвинение за шпионажа и обвинение за објавување доверливи информации и заговор за хакирање владин компјутер.

Конечната одлука за екстрадиција треба да ја донесе судот.

Минатиот месец Асанж беше уапсен во Амбасадата на Еквадор во Лондон, каде што  помина седум години откако Еквадор му додели азил. Тој сега се наоѓа во затворот „Белмарш“ во Лондон.

Асанж се соочува со обвиненија за силување во Шведска.