Европската Унија денеска го осуди уништувањето на големата брана на југот на Украина, со оценка дека тоа е нов пример за „варварска агресија“ од страна на Русија.

„Ова е нов знак на ескалација, страшен чин кој ја потврдува варварската природа на невидената руска агресија врз Украина“, изјави портпаролот на Европската комисија Петер Стано на прес-конференција во Брисел.

Германскиот канцелар Олаф Шолц во интервју за германскиот државен медиумски сервис WDR рече дека уривањето е одвратен чин,  додавајќи дека истиот е во согласност и со ескалацијата на руското насилство во Украина и со стратегијата на Путин за напад врз цивилни цели.

Претседателот на Литванија и министрите за надворешни работи на Летонија и Естонија се согласуваат дека уништувањето на браната Каховка во јужна Украина е воено злосторство за кое Русија мора да одговара.

Сепак, тие не понудија докази дека Русија стои зад уништувањето, наведува Ројтерс.

Русија ја обвини Украина.

Украинската полиција уапси 38-годишен маж под сомнение дека на 30 мај ја убил мајка си, а потоа нејзиното тело го исекол на парчиња и ги фрлил во контејнери низ Одеса.

Грозоморниот случај бил откриен кога граѓанин пријавил дека пронашол женска глава во контејнер додека исфрлал ѓубре.

Полицијата набргу пристигнала на местото на настанот, а потоа почнале да пристигнуваат извештаи дека се пронајдени и други делови од телото.

Набргу било утврдено дека жртвата е 60-годишна Украинка, жителка на Одеса, според медиумите во регионот.

Според сомнежите, нејзиниот син, по расправија, ја удрил неколкупати со секира, а кога таа беспомошно паднала на подот, ја задавил. После тоа, телото го одвлекол во бањата, каде што го исекол телото на парчиња и ги спакувал во вреќи.

Потоа отишол дома и се вратил следниот ден за да ги отстрани деловите од телото.

Полицијата за неполни 24 часа успеала да го идентификува и уапси.

Доколку се докаже дека е виновен, му се заканува затворска казна до 15 години.

Во последните неколку дена Турција страда од страшни поплави што го зафатија главниот град по обилните дождови, пренесуваат медиумите во регионот.

Портокаловата метеоролошка тревога е во сила во дури 27 провинции, а обилните дождови целосно го парализираа животот во Анкара.

Во изминатите неколку денови спасувачките екипи постојано се на терен и испумпуваат вода од зградите, а многу патишта често се непроодни поради пороите што носеа сѐ пред себе.

Колку е драматична ситуацијата во Турција најдобро сведочи видеото од Анкара, каде што може да се види како водата навлегла во станбена зграда, а потоа водниот бран ја крши балконската врата од станот и водата почнува да го исфрла мебелот.