Градоначалникот на Москва, Сергеј Собјанин, нареди баровите и рестораните да служат само вакцинирани гости и оние кои ја прележале инфекцијата и развиле имунитет.

Ова е една од подрастичните, но неопходни мерки разгледани од Кремљ, од каде доаѓаат предупредувања дека зголемувањето на бројот на заразени е предизвикано од делта варијантата на вирусот, која за прв пат беше откриена во Индија, но и од бавната имплементација на програмата за имунизација во Русија, иако дури четири вакцини од домашно производство се овластени за употреба.

Собјанин денес потврди дека новите ограничувања ќе стапат на сила на 28 јуни, наведувајќи дека таквите мерки се неопходни со цел да се избегне нова и построга блокада, пренесува „Ројтерс“.

Секој што сака да посети кафуле, ресторан или бар ќе мора да го покаже својот QR код како потврда за вакцинација, или доказ за прележан Ковид-19 или пак негативен тест не постар од 3 дена.

Кремљ денес објави дека граѓаните на Русија кои не биле вакцинирани или не прележале Ковид-19, неизбежно ќе се соочат со дискриминација на работното место.

„Луѓето кои не биле вакцинирани или не прележале Ковид-19 нема да можат да работат каде сакаат. Ова нема да биде можно бидејќи тие се закана за секој што работи со нив“, предупреди портпаролот на Кремљ, Дмитриј Песков, додека градоначалникот Собјанин посочи дека слични правила веќе со месеци се на сила во многу градови во Европа и Азија.

Шпанскиот премиер, Педро Санчез, денеска ги помилува сите девет каталонски лидери на сепаратистите, кои беа осудени за организирање на, според шпанскиот закон, нелегален референдум за независност и усвојување на Декларацијата за независност на Каталонија во 2017 година.

Санчез помилувањето го објави во телевизиско обраќање. Помилувањата се условни и забраната за вршење јавни функции за овие каталонски лидери останува на сила.

Санчез ги опиша помилувањата како знак на добра волја и прв чекор кон решавање на политичкиот конфликт на Мадрид со богатиот североисточен регион, чија влада бара нов референдум за независност, но со согласност на Мадрид.

Лидерот на социјалистите по владината седница рече дека овој потег ќе отвори нова фаза на дијалог што ќе овозможи поделбите и конфликтите да завршат еднаш и засекогаш.

Деветмината каталонски лидери беа осудени во 2019 година на затворски казни од девет до 13 години за бунт и злоупотреба на јавни средства при организирање на референдумот за независност на Каталонија од Шпанија.

Анкетите претходно покажаа дека околу 60 проценти од Шпанците, вклучувајќи ги скоро сите опозициски партии, се спротивставуваат на ослободувањето на политичарите и активисти приведени за нивната улога во хаотичните и понекогаш насилни настани, што ја предизвикаа најголемата политичка криза во Шпанија во последните неколку децении.

Медитеранот е познат по своите исклучително чисти води. Сепак, постои една земја во која можете да бидете сигурни дека водата за капење е чиста како што изгледа.

Европската агенција за животна средина (ЕЕА) неодамна спроведе тестирање на квалитетот на водата на 22.276 области за капење во 27 земји од Европската унија. Албанија, Швајцарија и Велика Британија беа додадени на споменатите земји, пишува „Травел магазин“.

Во објавениот извештај, Кипар убедливо се најде на прво место. Оваа островска земја доби совршен рејтинг од 100%, заслужувајќи ги највисоките пофалби за исклучително високиот квалитет на водата за капење. Всушност, од 112 плажи во земјата, секоја од нив доби највисок, „одличен“ рејтинг.

Генерално, европските води за капење поминаа прилично добро, бидејќи 82,8% од рангираните добија највисок рејтинг. По Кипар следуваат Австрија со 97,7%, Грција со 97,1%, Малта со 96,6% и Хрватска со 96,1% од своите локации кои се во категоријата врвен квалитет.

Извршниот директор на ЕЕА, Ханс Бројнинкс истакна дека добриот квалитет на европските води за капење е резултат на четири децениска работа на спречување и намалување на загадувањето. Законите на ЕУ не само што помогнаа да се подигне целокупниот квалитет. Исто така, значително помогна да се идентификуваат областите каде што треба да се преземат одредени мерки.