На премиерот на Етиопија, Абиџ Ахмед, денеска во Осло му беше врачена Нобеловата награда за мир. Тој се заложи за единство и помирување изјавувајќи дека ние и тие не постојат.

Ахмед (43) е награден за помирувањето и договорот постигнат со Еритреја, со кој се стави крај на 20-годишниот конфликт меѓу двете држави.

„Нема ние и тие, туку само ние затоа што сите сме поврзани со заедничката судбина на љубовта, простувањето и помирувањето“, рече премиерот на Етиопија.

Нобеловата награда се состои од златен медал, диплома и чек на девет милиони круни (околу милион евра). Паричниот износ на наградата се дели ако има повеќе лауреати во една дисциплина.

Француските аеродромски работници, наставници и други работници му се приклучија на штрајкот на вработените во целата земја, а синдикатите го засилија притисокот врз владата да се откаже од најавените измени во националниот систем за пензионирање.

Полицијата нареди продавниците и рестораните да останат затворени во Париз плашејќи се од улично насилство за време на попладневниот марш, јави АП.
Француските синдикати ги повикаа работниците да го организираат еден од најголемите протести во изминатите децении со надеж дека на шестиот ден од штрајкот ќе го надминат бројот на 800.000 луѓе колку што излегоа на улиците минатата недела во знак на протест против реформата на пензискиот систем што го предложи францускиот претседател Емануел Макрон, пренесува „Ројтерс“.

Патниците се соочија со прекин во сообраќајот, училиштата се затворени во Париз, а националната авиокомпанија „Ер Франс“ соопшти дека ги намалила домашните летови за 25 проценти.

Синдикатите не покажуваат никакви знаци на откажување и ги поттикнуваат железничките работници, лекарите, наставниците и другите вработени во јавните служби да му се спротивстават на Макрон пред неговата влада утре да предложи реформа во пензискиот систем.

Холандската национална агенција за борба против тероризмот го намали нивото на тероризам во земјата, за прв пат од 2013 година.

Заканата е сега на трето ниво, на скала од еден до пет, што значи дека нападот е сè уште можен.

„Џихадистите продолжуваат да вршат напади на Запад, но ситуацијата не може да се спореди со периодот 2015-2017 година, кога имаше десетина напади во Европа секој ден“, наведе холандската агенција.

Минатиот месец, двајца мажи беа уапсени во Холандија под сомнение дека подготвуваат напад.