Претседателот на САД, Доналд Трамп, повторно упати критики кон Шпанија, оценувајќи дека земјата е во лоша состојба.

„Дали некој видел колку лошо стои Шпанија? Нивните финансиски показатели се ужасни, а речиси ништо не придонесуваат за НАТО и својата одбрана. Тажно за гледање“, напиша Трамп на својата мрежа Truth Social.

Не е јасно што ја поттикнало неговата најнова реакција, но Шпанија претходно беше меѓу најгласните критичари на американската одлука за напади врз Иран.

Во меѓувреме, шпанската влада викендов организира самит во Барселона, на кој учествуваат левичарски лидери од Европа и Латинска Америка. Премиерот Педро Санчез порача дека „се забележуваат обиди за поткопување на меѓународното право“, изјава која се толкува како индиректна критика кон Трамп.

Турскиот министер за надворешни работи Хакан Фидан го обвини Израел дека ја користи војната на Блискиот Исток како изговор за проширување на територијата.

„Израел не сака само да ја обезбеди својата безбедност, туку сака уште територија. Владата на Нетанјаху ја користи безбедноста како изговор за окупација“, изјави Фидан на дипломатски форум во Анталија.

Според него, покрај палестинските територии, Израел се обидува да ја прошири својата доминација и кон делови од Либан и Сирија.

„Ова е континуирана окупација и експанзионизам. Ова мора да престане“, рече Фидан.

Тој додаде дека конфликтот на Блискиот Исток ги оттурнал во втор план напорите за решавање на војната меѓу Русија и Украина.

Се чека реакција на претседателот на САД, Доналд Трамп, откако Иран повторно го затвори Ормсукиот теснец, кусо по отворањето.

Трамп во текот на вчерашниот ден го прослави повторното отворање со серија објави на социјалните медиуми вчера, тврдејќи, меѓу другото, дека Иран се согласил никогаш повеќе да не го затвора водниот пат.