Во пресрет на денешната посета на БиХ, британската министерка за надворешни работи Лиз Трaс изјави дека обидите да му се додворат на Владимир Путин се „опасни“.

„Руската агресија не треба да се толерира, на неа треба да се одговори со сила“, се вели во соопштението на Лиз Трaс.

„Мораме да бидеме решени да ја обезбедиме победата на Украина со испраќање воена помош и санкции за Русија. Сега веќе не можеме да се тргнеме“, рече Трас, пренесе Индекс.хр.

Членот на Главниот совет на Воено-граѓанската управа на Запорожје, Владимир Рогов, денеска изјави за РИА Новости дека Украина засекогаш го изгубила пристапот до Азовското Море, бидејќи, според него, регионите Запорожје и Херсон никогаш нема да се вратат под контрола на Киев.

„Азовското Море е засекогаш изгубено за Украина. Пристаништата во регионите Запорожје и Херсон никогаш повеќе нема да бидат украински. Сигурен сум дека по обединувањето на нашите региони со Русија, Азовското Море повторно ќе биде исклучиво внатрешното море на Руската Федерација“, рече тој.

За време на специјалната операција, руската армија ја презеде контролата врз областа Херсон и Азовскиот дел на областа Запорожје во јужна Украина, пренесе Танјуг.

Најмалку пет цивили загинаа, а 12 се ранети во напад на руските сили на повеќе од 40 градови во Донбас, тврди украинската армија.

– Окупаторите гранатираа повеќе од 40 градови во регионите Доњецк и Луганск и уништија или оштетија 47 цивилни згради, меѓу кои 38 куќи и едно училиште. Во гранатирањето загинаа пет цивили, а 12 се ранети – објавија на Фејсбук украинските вооружени сили.

Во соопштението се наведува дека се одбиени 10 напади, а уништени се четири тенкови и четири дронови.

Исто така, се тврди дека загинале 62 непријателски војници.

Украинското Министерство за одбрана соопшти дека руските сили спроведуваат интензивна офанзива врз клучниот град Лиман во областа Доњецк.

Лиман е важен железнички центар и ако Русите успеат да ја преземат контролата таму, блискиот град Славјанск станува поранлив на напади, а украинските војници југоисточно од градот стануваат поизложени на опасностите од опсада, пренесуваат мадиумите.