Новиот сириски привремен премиер Мохамед ал Башир ги повикува сириските бегалци ширум светот да се вратат во својата татковина по соборувањето на режимот на Башар ал Асад.

„Ги повикувам сите Сиријци во странство: Сирија сега е слободна земја која си ја врати гордоста и достоинството. Вратете се!“, рече Башир во интервју за италијанскиот весник „Кориере дела сера“ објавено денеска, обраќајќи им се на милионите Сиријци кои ја напуштија својата земја од избувнувањето на граѓанската војна.

Со крајот на повеќедецениското владеење на семејството Асад, сега мора да се обноват безбедноста и стабилноста во сите сириски градови за да можат луѓето да се вратат во нормалниот живот, рече Башир. Во моментов се очекува тој да остане на функцијата до март.

Истакна декаедна од неговите најважни цели ќе биде да и помогне на земјата разорена од војна да се опорави, а сириските бегалци би можеле да играат важна улога по нивното враќање со нивното искуство стекнато во странство.

„Мораме да ја обновиме нашата земја и да ја поставиме на здрава основа и ни треба сечија помош“, рече тој.

Башир претходно беше премиер во упориштето на бунтовниците Идлиб. Оттаму, исламистичката група Хајат Тахрир ал-Шам (ХТС) – чиј главен командант е Ахмед ал Шара, попознат како Абу Мохамед ал Голани, ја започна офанзивата со која беше соборен Асад на 8 декември.

Башир се обиде да ги ублажи стравувањата на критичарите дека ХТС може да изврши премногу исламистичко влијание врз остатокот од Сирија.

„Погрешното однесување на некои исламистички групи доведе многу луѓе, особено на Запад, да ги поврзуваат муслиманите со тероризмот, а исламот со екстремизмот“, рече тој.

Тој го опиша тоа како лажна карактеризација и потврди дека сака да ги гарантира правата на сите луѓе во Сирија.

Запрашан за надворешната политика, Башир рече дека тој и неговата преодна влада „немаат проблеми со земјите, партиите или сектите кои се дистанцираат од крвожедниот режим на Асад“. На прашањето дали тоа значи дека сака да се дистанцира од Иран, Русија и Хезболах и да склучи мир со Израел, Башир не одговори.

Унгарскиот премиер Виктор Орбан објави дека му се јавил на рускиот претседател Владимир Путин и разговарал со него еден час.

„Зборував со претседателот Путин еден час утрово: ова се најопасните недели од руско-украинската војна. Ние го преземаме секој можен дипломатски чекор со цел прекин на огнот и мировни преговори“, објави Орбан на „Икс“, поранешен „Твитер“.

И Кремљ потврди дека двајцата лидери разговарале телефонски додавајќи дека повикот бил инициран од канцеларијата на Орбан.

Повикот се случува по посетата на Орбан на Флорида, каде што се сретна со новоизбраниот претседател на САД, Доналд Трамп. Тоа беше втор разговор на Путин со европски лидер во последните неколку недели бидејќи рускиот претседател неодамна телефонски разговараше со германскиот канцелар, Олаф Шолц.

„Виктор Орбан изрази интерес за промовирање заедничка потрага по политичко и дипломатско решение на кризата, вклучително и земајќи ги предвид неговите контакти со голем број западни лидери“, соопшти Кремљ мислејќи на руската војна во Украина.

Според Кремљ, „Владимир Путин ја изразил својата оценка за сегашниот развој на ситуацијата во врска со Украина и деструктивната линија на режимот во Киев, што сепак ја исклучува можноста за мирно решавање на конфликтот“.

Унгарија одржуваше блиски дипломатски и економски врски со Москва дури и по руската инвазија на Украина во 2022 година одбивајќи да испрати воена помош за Киев и гласно се спротивставуваше на санкциите на ЕУ против Русија, иако на крајот гласаше за секој од пакетите.

Кремљ денеска ја минимизираше важноста на падот на својот сириски сојузник Башар ал Асад за руското влијание на Блискиот исток, велејќи дека Москва се фокусира на Украина и дека е во контакт со новите власти во Сирија.

Кога Русија интервенираше во сириската граѓанска војна во 2015 година, тоа му даде значителна предност на Асад, а неговиот пад нанесе сериозен удар и на Москва, која води војна во Украина, и на Иран, кој се судри на исток со Израел, кој е поддржан од Соединетите Американски Држави.

„Секако дека сме во контакт со оние кои моментално управуваат со ситуацијата во Сирија“, изјави за новинарите портпаролот на Кремљ, Дмитриј Песков.

На прашањето колку падот на Асад го ослабе руското влијание во регионот, Песков рече дека Москва одржува контакти со сите земји во регионот и дека ќе продолжи да го прави тоа.

Приоритет за Москва, рече Песков, е специјална воена операција, рече Песков.

„Специјалната воена операција е апсолутен приоритет за нашата земја: ние мора да ги гарантираме интересите на нашата безбедност, интересите на нашиот руски народ и тоа ќе го направиме“, рече Песков.

Москва ја поддржува Сирија уште од раните денови на Студената војна, признавајќи ја нејзината независност во 1944 година, кога Дамаск се обидуваше да се ослободи од француската колонијална власт. Западот ја сметаше Сирија за советски сателит.