Германската канцеларка, Ангела Меркел, примила втора доза од вакцината на „Модерна“, по првата доза од „Астразенека“, соопшти нејзиниот кабинет.

„Да, потврдуваме дека германската канцеларка неодамна ја доби втората доза на вакцина од американската компанија ‘Модерна’, откако прими прва доза од шведско-британската ‘Астразенека’ на 16 април“, соопштил портпаролот на канцеларката.

66-годишната Меркел ја прими вакцината на „Астразенека“ на 16 април, чија употреба беше суспендирана во Германија некое време, откако беа пријавени неколку случаи на згрутчување на крвта во Европа.

Употребата на таа вакцината, која првично ја примија повеќе германски официјални лица, вклучувајќи го и претседателот Франк-Валтер Штајнмаер, во Германија е резервирана за луѓе над 60 години.

Неколку земји, меѓу кои и Германија, одлучија да дадат втора доза на вакцина која ја користи таканаречента технологија на информациона РНК, како што се оние на „Фајзер“ / „Бионтек“ или „Модерна“ и да применат комбинација на вакцини по првата доза од „Астразенека“.

Повеќе од половина (51,2 проценти) од германското население, или 42,5 милиони луѓе, примиле барем една доза на вакцина, а 26,3 милиони, или 31,6 проценти, се целосно вакцинирани, според податоците објавени од институтот „Роберт Кох“.

Ватикан протестира против италијанскиот нацрт-закон за борба против хомофобијата, наведувајќи дека тој нацрт-закон, во сегашната форма, може да ја ограничи верската слобода на Католичката црква во Италија.

Протестната нота, која за првпат ја објави весникот „Кориере дела сера“ и која ја потврди претставник на Ватикан, била испратена од министерот за надворешни работи на Ватикан на 17 јуни на адреса на италијанската амбасада при Светата Столица.

Протестот е направен поради таканаречениот „закон на Зан“, именуван по Алесандро Зан, законодавецот на Демократската партија, со хомосексуална ориентација. Законот помина во долниот дом на италијанскиот парламент и во моментов се дискутира во комитет во Сенатот.

Ватикан верува дека законот, како што е напишан во моментов, го крши Латеранскиот пакт од 1929 година, кој Ватикан ја утврдува како суверена држава и ги регулира односите меѓу Ватикан и Италија.

Ватикан стравува дека законот, во сегашната форма, може да доведе до криминализација на црквата во Италија поради одбивањето да се склучуваат хомосексуални бракови, спротивставувањето на тоа геј двојките да посвојуваат деца или поради одбивањето да се предава родова теорија во католичките училишта, посочил извор од Ватикан.

Градоначалникот на Москва, Сергеј Собјанин, нареди баровите и рестораните да служат само вакцинирани гости и оние кои ја прележале инфекцијата и развиле имунитет.

Ова е една од подрастичните, но неопходни мерки разгледани од Кремљ, од каде доаѓаат предупредувања дека зголемувањето на бројот на заразени е предизвикано од делта варијантата на вирусот, која за прв пат беше откриена во Индија, но и од бавната имплементација на програмата за имунизација во Русија, иако дури четири вакцини од домашно производство се овластени за употреба.

Собјанин денес потврди дека новите ограничувања ќе стапат на сила на 28 јуни, наведувајќи дека таквите мерки се неопходни со цел да се избегне нова и построга блокада, пренесува „Ројтерс“.

Секој што сака да посети кафуле, ресторан или бар ќе мора да го покаже својот QR код како потврда за вакцинација, или доказ за прележан Ковид-19 или пак негативен тест не постар од 3 дена.

Кремљ денес објави дека граѓаните на Русија кои не биле вакцинирани или не прележале Ковид-19, неизбежно ќе се соочат со дискриминација на работното место.

„Луѓето кои не биле вакцинирани или не прележале Ковид-19 нема да можат да работат каде сакаат. Ова нема да биде можно бидејќи тие се закана за секој што работи со нив“, предупреди портпаролот на Кремљ, Дмитриј Песков, додека градоначалникот Собјанин посочи дека слични правила веќе со месеци се на сила во многу градови во Европа и Азија.