Германската држава одлучи да им додели највисок орден на основачите на фармацевтската компанија „Бионтек“, која прва разви и лансираше вакцина против коронавирус на пазарот.

Како што беше соопштено од кабинетот на претседателот на Германија, шефот на германската држава, Франк Валтер Штајнмаер, на 19 март ќе го предаде „Крстот за заслуги со ѕвезда“ на брачната двојка научници Езлем Тиречи и Угур Сахин.

Тоа ќе му биде прво лично врачување на ордени на Штајмер оваа година, а ќе се одржи во палатата Белви во Берлин.

Шеснаесет членови на Европскиот парламент побараа од министерот за надворешни работи на ЕУ, Џозеп Борел, да го смени амбасадорот на ЕУ во Куба, Алберт Наваро, бидејќи тој наводно се приклонил на тамошниот режим, кој ниту ги почитува ниту ги брани човековите права.

„Сакаме да ја искажеме нашата збунетост и неодобрување за невообичаеното и редовно однесување на амбасадорот на Европската Унија во Куба, г. Алберт Наваро“ – се наведува во писмото потпишано од пратениците од Европската народна партија (ЕПП), „Изгради ја Европа“ и групите на Европските конзервативци и реформатори, пренесува бриселски „Политико“.

Пратениците изјавија дека Наваро, меѓу другото, потпишал и писмо упатено до претседателот на САД, Џо Бајден, во кое бара укинување на американските санкции за Куба и немешање во нејзините работи.

Пратениците заклучија дека Наваро зазема политички ставови слични на оние на режимот во Куба и дека си дозволува слободи кои се потипични за политички лидер отколку за дипломатски претставник.

„Политико“ наведува и дека портпаролот на Борел не бил достапен за коментар.

Рускиот опозициски лидер Алексеј Навални е префрлен во казнена колонија каде што треба да издржи казна затвор од две и пол години, изјави шефот на затворската служба Александар Калашников.

„Тој е префрлен на местото каде што треба да биде според одлуката на судот“, рече Калашников, додавајќи дека нема закани по неговиот живот или здравјето.

Адвокатот на Навални вчера изјави дека рускиот опозиционер е пренесен во затвор надвор од Москва.

Руските медиуми претходно навестија дека Навални, кој беше во најстрого чуваниот затвор во Москва, ќе биде префрлен во објект во западна Русија.

Москва не ја послуша пресудата на Европскиот суд за човекови права во Стразбур, со кој им се нареди на руските власти да го ослободат Навални, наведувајќи ги како причина ризиците во затворот за неговиот живот.

Навални (44), најпознатиот противник на рускиот претседател Владимир Путин, беше уапсен на 17 јануари, веднаш по враќањето од Германија, каде закрепнуваше пет месеци од труењето за кое го обвинува Кремљ.

Руските власти ги отфрлаат овие тврдења и го обвинуваат Навални за соработка со западните разузнавачки служби.

Во февруари судот во Москва го осуди Навални на две и пол години затвор под обвинение дека ја прекршил условната казна додека бил во Германија каде што закрепнувал од труење.