Рускиот претседател Владимир Путин викендов дојде во ненадејна посета на окупираните територии на Украина, повторно поттикнувајќи ги теоретичарите на заговори, но и некои украински функционери да шпекулираат дека тој користи девојници.

Критичарите укажуваат на еден дел од неговото тело за да ги докажат своите наводни тврдења – неговите уши и подбрадокот.

Петро Андриушченко, советник на градоначалникот на Мариупол, украинскиот град што Путин го посети, на „Телеграм“ напиша дека „Путин или еден од неговите двојници“ бил во ноќна посета на окупираниот регион.

Иако заговорот може да звучи лудо, понекогаш се користат политички двојници на меѓународната сцена.

Антон Герашченко, украински функционер сподели фотографии на кои ги посочи наводните разлики во брадата на Путин направена во Москва и Путин во Мариупол.

„Што мислите, кој е вистинскиот?“, праша тој преку Твитер.

Which one do you think is the real one? pic.twitter.com/SV8TVdnUQE

— Anton Gerashchenko (@Gerashchenko_en) March 20, 2023

Претходно во интервју за „Дејли Мејл“, шефот на воената разузнавачка служба на Украина, генерал-мајор Кирил Буданов, објави дека рускиот претседател користи тим од двојници. Двојниците, рече Буданов, и порано го менувале Путин само во посебни прилики, но по инвазијата на Украина, тие наводно станале вообичаена практика.

„Знаеме конкретно за три двојки, но не знаеме колку се вкупно“, рече Буданов во интервјуто во ноември.

„Сите направија пластична операција за што повеќе да личат на него. Една од работите што ги поврзува е нивната висина. Тоа е видливо на снимките и фотографиите. Но, говорот на телото и ушите е нешто што е уникатно за секој човек“, рече тој.

Корисниците на „Твитер“ гласно шпекулираат дека двојникот на Путин отишол во Украина, фокусирајќи се и споредувајќи го обликот на неговото уво, како и неговата брада со фотографии од 2006 и 2018 година.

Тврдењата на Буданов за употребата на двојници не можат да се потврдат, но користењето на ушите во контекст на единствениот „човечки отпечаток“ се практикува со децении.

Од 1950-тите, форензичарите користеа мерења на ушите за да ги идентификуваат осомничените, а во ерата на дигиталните алгоритми, угледниот Wired еднаш објави дека софтверот што ги идентификува луѓето по нивните уши може да биде поефективен идентификатор од, да речеме, отпечатоците од прсти.

Во 2018 година, Интернешнл Бизнис Тајмс ја нарече идејата дека Путин користи двојници „една од најчестите теории на заговор“ – но скептиците не се убедени.

Истражниот комитет на Русија соопшти дека отворил кривична постапка против обвинителите и судиите во Меѓународниот кривичен суд (МКС), кои во петокот издадоа налог за апсење на претседателот Владимир Путин под обвинение за воени злосторства.

Комитетот, кој е одговорен за истрага на сериозни злосторства, рече дека нема основа за кривично да одговара рускиот претседател Путин и дека шефовите на држави уживаат апсолутен имунитет од странска јурисдикција.

Постапките на обвинителите на МКС покажуваат знаци на кривично дело според рускиот закон, рече Комитетот, истакнувајќи дека станува збор за свесно обвинување невино лице за кривично дело и „подготвување напад врз претставник на странска држава, кој ужива меѓународна заштита, со цел да се комплицираат меѓународните односи“.

Потегот на Русија е симболичен гест на пркос како одговор на налогот за апсење на Путин, кој ги обвини него и комесарот за правата на децата за воено злосторство за депортирање деца од Украина во Русија.

Кремљ ја нарече одлуката на МКС срамота, но правно неважечка, бидејќи Русија не е потписник на договорот со кој беше основан МКС.

Кинескиот претседател Шји Џјинпинг изјави денеска во Москва дека Кина е одлучно подготвена, заедно со Русија, да го поддржи меѓународниот систем, во чиј центар се ОН, во денешниот турбулентен свет и да се залага за светски поредок заснован на меѓународното право.

„Кина и Русија како големи сили и постојани членки на Советот за безбедност на ОН играат важна улога во меѓународните работи. Во свет далеку од мирен, Кина е подготвена заедно со Русија одлучно да го брани меѓународниот систем во чиј центар се ОН, да го зачува светскиот поредок заснован на меѓународното право и основните норми на меѓународните односи засновани на целите и принципите на Повелбата на ОН придржувајќи се до вистинскиот мултилатерализам, промовираат глобална мултиполарност и демократизација на меѓународните односи, промовираат развој на глобалното владеење на поправедна и порационална насока“, рече Шји по пристигнувањето во Москва.

Како што јави „РИА новости“, претседателот на Кина рече дека има намера да разговара со претседателот на Русија за важни регионални и меѓународни теми од заеднички интерес.

„За време на посетата очекувам да имам темелна размена на мислења со претседателот Владимир Путин за прашања од билатералните односи и важни регионални и меѓународни теми од заеднички интерес, како и да изложам план за развој на стратешка интеракција и практична соработка“, рече тој.

Убеден е дека неговата посета на Москва ќе биде плодна.

„Уверен сум дека посетата ќе биде плодна и ќе даде нов поттик за здрав и стабилен развој на кинеско-руските односи на сеопфатно партнерство и стратешка соработка во новата ера“, рече кинескиот претседател.

Кинескиот лидер рече дека двете земји имаат долгогодишно пријателство меѓу нивните народи. Џјинпинг до 22 март е во посета на Русија на покана на рускиот претседател Владимир Путин.

Оваа посета е негово прво патување во странство откако беше реизбран за шеф на државата трет мандат.