Десетте најбогати луѓе во светот би можеле да купат вакцини за сите жители на планетата, покажуваат податоците од извештајот на меѓународната хуманитарна организација „Оксфам“.

Нивното вкупно богатство се зголеми за 540 милијарди долари за време на пандемијата на коронавирусот и сега изнесува 11,95 трилиони долари, се наведува во извештајот на организацијата под наслов „Вирус на нееднаквост“.

Тие пари се доволни за да се спречи речиси секој поединец да падне во сиромаштија за време на пандемија и да му обезбеди вакцина против коронавирусот, пресметале истражувачите од „Оксфам“, пренесува „Ројтерс“.

Количината на богатство што ја имаат овие 10 лица е еднаква на вкупното трошење на членките на Г20 за да закрепнат од пандемијата. Затоа „Оксфам“ ги повикува владите да размислат за оданочување на супер богатите.

Некои од нив дадоа значителен придонес за итен одговор на пандемијата.

Меѓу 10-те најбогати луѓе се наоѓаат лидерот на Амазон, Џеф Безос, лидерот на Тесла, Илон Маск и основачот на Фејсбук, Марк Закерберг.

И Москва и Техеран се заинтересирани за целосно обновување на иранскиот нуклеарен договор, познат и како Заеднички сеопфатен план за акција (ЈЦПОА), изјави рускиот министер за надворешни работи Сергеј Лавров за време на состанокот со неговиот ирански колега Џавад Зариф, пренесува „Спутник“.

„Спасот на ЈЦПОА е една од најакутните теми на агендата. И Русија и Иран се длабоко заинтересирани за целосно враќање на земјите потписнички кон исполнување на нивните обврски согласно договорот“, рече Лавров.

Иранскиот министер за надворешни работи Џавад Зариф, пак, изрази благодарност до Москва за нејзината конструктивна и непоколеблива позиција по прашањето на ЈЦПОА.

Рускиот министер за надворешни работи истакна дека поради улогата на Москва и на Техеран во регионот, двете држави се заинтересирани и за проширување на дијалогот за низа други прашања, како што се безбедноста во Персискиот Залив, решавањето на домашниот конфликт во Авганистан и состојбата во Нагорно-Карабах.

Иако новиот американски претседател Џо Бајден изрази интерес за преговори за враќање на иранскиот нуклеарен договор, Вашингтон допрва ќе започне разговори со Техеран. Договорот претрпе голем удар во 2018 година, откако поранешниот американски претседател Доналд Трамп ја повлече својата земја од договорот и наметна санкции кон Исламската Република.

Романската погранична полиција открила 22 илегални мигранти во три камиони. Мигрантите се од Авганистан, Сирија, Либан, Турција и Ирак. Тие биле скриени во посебни прегради во камионите, пренесе агенцијата „Адјерпрес“.

Седуммина мигранти од Ирак, на возраст од 16 до 26 години, биле откриени во камион кој го возел државјанин на Романија на граничниот премин Надлак II со Унгарија.

На истиот граничен премин, но во друг камион биле откриени петмина мигранти од Турција и Ирак.

На преминот РТФ Борс 2 во камион со полски регистарски таблички, кој го возел државјанин на Белорусија биле откриени 10 мигранти од Авганистан, Сирија и Либан, кои барале азил во Романија.

Како што се наведува, во сите случаи полицијата истражува дали возачите на камиони се вмешани во криумчарење луѓе.