Гувернерот на Доњецк повика 350.000 цивили да се евакуираат од тој источен украински регион поради претстојната руска офанзива.

Повикот дојде еден ден откако рускиот претседател Владимир Путин прогласи победа во соседниот регион Луганск, кој целосно падна во руски раце оваа недела. Се верува дека Доњецк е следната цел на Русите, поради што властите ги повикаа цивилите да се евакуираат.

Гувернерот на Доњецк, Павло Кириленко, изјави дека евакуацијата на 350.000 цивили е „неопходна за да се спасат животи“ и „да и се овозможи на украинската армија полесно да ги брани градовите од руската офанзива“.

„ Во Доњецк ќе се решава судбината на целата земја. Кога цивилите ќе бидат евакуирани од регионот, армијата ќе може да се концентрира на непријателот“, најави Кириленко.

Вчера руските сили силно го бомбардираа Славјанск, град во Доњецк за кој се верува дека заедно со Краматорск е клучна цел на руските сили. Градоначалникот на Словјанск, Вадим Лика преку Фејсбук ги повика жителите да се евакуираат.

Хрватското Министерство за образование и наука отвори инспекциска постапка во училиштето во кое учи синот на хрватскиот претседател Зоран Милановиќ откога неговата сопруга, како што тврди „Јутарњи лист“, извршила притисок врз директорот на училиштето да му ги смени веќе заклучените оценки на син ѝ, и тоа од четворки во петки.

Според весникот, Сања Мусиќ-Милановиќ на 24 јуни испратила имејл до директорот на училиштето на син ѝ, класниот раководител и до училишниот психолог наведувајќи ги неправилностите во наставата по математика како причина за промената на оценките.

Ова предизвика бран реакции во медиумите поради наводниот притисок на сопругата на претседателот да му ги зголеми оценките на синот, така што просекот на сите негови оценки би бил пет, пренесуваат хрватските медиуми.

Според „Хина“, Милановиќ денеска изјавил дека не знаел за писмото на сопругата до училиштето и дека тој немало да го напише. Милановиќ исто така ја нападнал и компанијата „Ханза медија“, сопственик на „Јутарњи лист“, поради објавување напис на оваа тема.

„Не знаев. И јас не би бранел нешто само затоа што жена ми го направила. Кога се занимаваш со ваква работа, тоа всушност ништо не значи, но, според мене, тука е многу помалку важно од начинот на кој криминалната организација „Ханза медија“ ја подготвила“, рече Милановиќ.

Тој додаде дека со тоа писмо неговата сопруга оставила „бразда длабока три метри“.

„Да ми го направеше тоа мајка ми кога имав 17,5 години, ќе полудев“, изјави Милановиќ. „ Но, мама е мама, сега мама остави пишан белег“, рече Милановиќ.

Хрватскиот претседател смета и дека цел на текстот во весникот не е неговата сопруга, туку лично тој.

Рускиот милионер Јуриј Воронов (61), шеф на логистичка компанија која имала профитабилни договори со „Газпром“ на Арктикот, е пронајден мртов во својот дом, во богатото предградие на Санкт Петербург.

Воронов вчера бил пронајден како лебди во базенот со прострелна рана во главата, а на дното од базенот биле пронајдени неколку патрони.

Рускиот истражен комитет ја истражува смртта на Воронов за која во моментот се сомневаат дека е предизвикана од спор со деловните партнери. Неговата сопруга наводно ѝ рекла на полицијата дека Воронов се жалел оти бил измамен од нечесни изведувачи и партнери за многу пари и дека неодамна почнал да пие многу.

Ова е само една во низата мистериозни смртни случаи на руски богаташи од почетокот на инвазијата на таа земја на Украина.

Александар Тулаков (61), висок функционер за финансии и осигурување на „Газпром“, беше пронајден мртов во својот дом во февруари. Инспекторите рекоа дека тој се самоубил, но локалните извештаи велат дека на неговото тело имало знаци на насилство, што укажува на тоа дека бесењето било наместено.

Три недели претходно 60-годишниот Леонид Шулман беше пронајден мртов, избоден во бањата. Шулман беше шеф на транспортот во „Газпром инвест“, филијала на енергетскиот гигант задолжен за инвестициски проекти.

Милијардерот Александар Суботин (43), поранешен висок функционер во енергетскиот гигант „Лукоил“, исто така беше пронајден мртов во мај. Една од теориите е дека тој бил отруен со отров што предизвикал срцев удар.