Катедралата Нотр Дам во Париз, уништена во пожар пред две години, повторно ќе биде отворена во 2024 година, вети во средата француската министерка за култура Розелин Башело, најавувајќи дека јавната акција, започната за нејзино обновување, овозможила да се соберат доволно средства.

„Собрани се 833 милиони евра досега и собраната сума ни овозможува смирено да размислиме за реконструкција“, изјави министерката во Сенатот.

„Можам да ви кажам дека во 2024 година катедралата Нотр Дам повторно ќе се отвори“, додаде таа.

Министерката денеска треба да го посети градилиштето заедно со претседателот Емануел Макрон, на втората годишнина од пожарот што делумно ја уништи Богородичната црква, која се смета за ремек-дело на готската уметност.

Вечерта на 15 април 2019 година избувна пожар во катедралата Нотр Дам во Париз, при што се урна кулата и голем дел од покривот беше уништен, но пожарникарите сепак успеаја да ја зачуваат грандиозната средновековна зграда.

Причината за пожарот сè уште не е утврдена, иако истражителите ја отфрлаат идејата дека тој бил предизвикан намерно. Тие се фокусирани на краток спој или дури и на отфрлен отпушок како можни причини.

Работите за реновирање допрва треба да започнат бидејќи сега се работи на обезбедување на зградата. Ова треба да заврши до лето, па вистинските реновирања да започнат на почетокот на следната година.

Целта е да се одржи првата целосна богослужба во возобновената катедрала на 15 април 2024 година, и покрај одложувањата заради пандемијата.

Поранешната полицајка Ким Потер, која во саботата го уби 20-годишниот Aфроамериканец Донте Рајт, е обвинета за убиство од втор степен, објави обвинителството.

Потер беше уапсенa, а подоцна ослободенa со кауција од 100.000 американски долари. Убиството доведе до повеќедневни протести и судири меѓу демонстрантите и полицијата во градот Бруклин, центар во американската држава Минесота, а неколку стотици учесници на протестот се собраа повторно пред седиштето на полицијата во средата вечерта и покрај полицискиот час.

Како и претходните ноќи, демонстрантите фрлаа шишиња и други предмети кон полицијата, која пак возврати со солзавец и шок-бомби. Според полицијата, Потер случајно го застрелала Рајт затоа што тој по грешка користел пиштол наместо тајзер. Семејниот адвокат на Рајт, Бен Крамп, смета дека убиството било намерно и дека станува збор за „незаконска употреба на сила“.

По убиството, Потер и шефот на локалната полиција Тим Генон поднесоа оставки. Генон објави снимки од камерите од опремата што ја носеше Потер, ден по пукањето.

На видеото се гледа како таа се приближува кон Рајт кој стоел покрај неговиот автомобил додека друг полицаец го уапсил со налог за него што сè уште бил на сила. Потерницата била издадена затоа што Рајт не се појавил на суд кога бил обвинет за бегство од полицијата во јуни и поседување пиштол без дозвола. Полицијата соопшти дека го запреле Рајт поради истечените регистарски таблички.

Кинеските маневри околу Тајван ја менуваат „статусот-кво“ позицијата во регионот на Индо-Пацифик, рече тајванската претседателка Цаи Инг-Вен, ветувајќи дека ќе работи со САД и со другите земји за зачувување на регионалната стабилност.

Цаи ја извести неофицијалната американска делегација предводена од поранешниот демократски сенатор Кристофер Дод дека Кина често распоредува бродови и авиони за да извршат маневри во водите и воздушниот простор околу Тајван.

„Овие активности ја менуваат „статус-кво“ состојбата во областа на Индо-Пацификот и го загрозуваат регионалниот мир и стабилност“, рече Цаи.

Дод рече дека партнерството на САД со Тајван е посилно од кога и да е, затоа што САД и Тајван имаат силни економски врски, заедничка посветеност на демократските вредности и „критичко безбедносно партнерство“.

Дод вели дека дошол во Тајван на покана на неговиот долгогодишен пријател, претседателот Џо Бајден, за да ја потврди посветеноста на Америка кон овие партнерства и да ја продлабочи соработката за многу заеднички интереси.

Тој исто така и кажа на тајванската претседателка дека администрацијата на Бајден е доверлив пријател на кој може да му се верува.

Администрацијата на Бајден ќе му помогне на Тајван да го прошири својот меѓународен простор, да ги поддржи инвестициите во одбраната и да ги зајакне веќе силните економски врски, рече Дод.