Повторувајќи ја изјавата на руското Министерство за одбрана, Лавров денеска им рече на новинарите дека трговскиот центар бил празен во моментот кога дошло до пожарот поради тоа што Русија погоди складиште за оружје и муниција.

Лавров изјави дека што повеќе Западот испраќа оружје во Украина, толку подолго ќе трае судирот.

Шефот на руската дипломатија при посетата на Туркменистан рече дека Русија вчера не го гаѓала трговскиот центар во украинскиот град Кременчук, каде што загинаа најмалку 18 луѓе, пренесува „Ројтерс“.

Украина може да ја заврши војната пред крајот на денот, а за тоа да се случи, сè што е потребно е наредбата на украинскиот претседател армијата да го остави оружјето и да ги исполни условите на Москва, изјави портпаролот на Кремљ, Дмитриј Песков, пренесува руската државна агенција „РИА новости“.

„Украинската страна може да запре сè пред крајот на денешниот ден, потребна ни е наредба за националистичките единици да го положат оружјето, наредба украинската армија да го остави оружјето и мора да се исполнат условите на Руската Федерација. Сè може заврши пред крајот на денот“, рече Песков коментирајќи ја изјавата на Владимир Зеленски за плановите за завршување на војната пред зимата.

Медиумите потсетуваат дека двајца неименувани дипломати на Европската Унија вчера за новинските агенции изјавиле дека Зеленски им кажал на лидерите на Г7 дека сака војната да заврши пред зимата.

Во своето вчерашно обраќање Зеленски повикал на системи за противвоздушна одбрана, повеќе санкции за Русија и безбедносни гаранции, изјавил европски претставник. Украинскиот претседател побарал и помош за извоз на жито од Украина и за обнова на земјата, изјавил европски функционер, кој сакал да остане анонимен, пренесува агенцијата.

Советот на ЕУ денеска даде зелено светло за продолжување на користењето на дигиталните сертификати за Ковид-19 до 30 јуни 2023 година.

Проширувањето на оваа регулатива ќе обезбеди дека патниците од ЕУ, како и оние од трети земји поврзани на системот, ќе може да продолжат да го користат дигиталниот сертификат за патување во рамките на Унијата во земјите членки, каде што овие сертификати и понатаму се потребни.

Во соопштението на Советот на ЕУ се наведува дека дигиталниот сертификат за К0вид-19 одигра важна улога во овозможувањето слободно движење на луѓето за време на пандемија и дека регулативата може да се укине порано доколку тоа го дозволи здравствената состојба.

Иако во поголем број земји членки употребата на дигиталните ковид-сертификати во моментот не е задолжителна за слободно патување, поради зголемениот број на заразени и хоспитализирани поради вирусот Sars-Cov2, тој би можел да се врати во употреба за патување во Европа во наредниот период.