Австрија ќе добие дополнителни 100.000 дози од вакцината на „Фајзер“ против Ковид-19.

Овие дози ќе служат за да се вакцинираат возрасните во алпскиот регион Тирол, едно од најголемите жаришта на јужноафриканскиот сој на коронавирус во Европа, соопшти денеска владата.

Минатиот месец австриската влада воведе негативен тест на коронавирус како обврзувачки за напуштање на Тирол.

Студиите покажуваат дека постојните вакцини може да бидат помалку ефикасни против оваа варијанта.

„Нашата цел е да го потиснеме овој вид најдобро што можеме. Овој вид коронавирус претставува закана за сите нас, не само во Тирол туку и во цела Австрија“, рече канцеларот Себастијан Курц.

Курц додаде дека ќе бидат спроведени истражувања за да се утврди дали вакцината на „Фајзер“ е ефикасна против јужноафриканскиот сој до степен до кој владата очекува.

Велика Британија го осуди убиството на саудискиот новинар Џамал Кашоги и продолжува да бара целосна истрага за неговата смрт, изјави британскиот премиер Борис Џонсон.

Тој зборуваше на прес-конференција во Лондон, на која беше запрашан дали Велика Британија ќе ја прекине продажбата на оружје на Саудиска Арабија поради конфликтот и хуманитарната криза во Јемен, каде што саудиската коалиција се бори против јеменските бунтовници на страната на меѓународно признатата влада.

Џонсон истакна дека Велика Британија го почитува долгогодишниот пакет-правила и конвенции за продажба на оружје.

Словачка од вечерва ќе воведе полициски час, изјави министерот за здравство, Марек Крајчи.

Според владината одлука, на Словаците нема да им биде дозволено да ја напуштат куќата од 20 до 5 часот наутро.

На луѓето им се препорачува да останат дома, исклучок е доколку треба да одат на лекар, на работа или на прошетка за рекреација или со кучиња. Полицискиот час ќе биде задолжителен до 19 март и може да биде продолжен, известуваат од владата на Словачка.

Земјата со 5,4 милиони жители во последните две недели има пријавено просечно 24 смртни случаи на 100.000 жители, јавуваат светските агенции.

„Високата стапка на смртност се должи на многу фактори, Словачка направи голем број грешки“, рече претседателот на медицинскиот синдикат, Питер Висолајски.

„Карантинот беше воведен предоцна и не беше доволно набљудуван. Покрај тоа, стапката на смртност е последица на општо лошата здравствена состојба во Словачка“, рече Висолајски.

Според него, наместо да се воведуваат нови ограничувања, подобро е да се применат постојните за да се намали бројот на заразени лица.