Набавката на вакцини за Западен Балкан ќе биде една од темите на состанокот на лидерите на членките на Европската унија (ЕУ), што ќе се одржи в четврток, објави Брисел.

Претседателот на Европскиот совет, Шарл Мишел, истакна дека лидерите на ЕУ треба да разговараат за соработката со трети земји во врска со вакцините.

„Ќе видиме како можеме да им помогнеме на нашите партнери во соседството и пошироко“, рече Мишел, пренесува Танјуг.

Во писмото со покана до лидерите на земјите-членки на ЕУ, во пресрет на видео-конференцијата закажана за четврток во 18 часот, Мишел наведува дека на состанокот ќе се разговара и за кампањата за вакцинација во рамките на Унијата.

„Забрзувањето на вакцинацијата низ ЕУ е наш апсолутен приоритет“, рече Мишел.

Покрај дискусијата за набавка и дистрибуција на вакцини низ ЕУ и во соседството, Мишел објави и разговори за сертификати за вакцинација.

„Ќе разговараме за соодветноста на заедничкиот пристап кон сертифицирање, како и, доколку е потребно, околностите под кои може да се користат ваквите сертификати“, рече Мишел.

Тој оцени дека моменталната состојба со заразата со Ковид-19 во Европа бара голема претпазливост.

Мишел повика, покрај почетокот на вакцинацијата, да се продолжи со обемно тестирање и следење на контактите, но и да се овозможи прекугранично движење во рамките на ЕУ.

Најмалку 12 лица се убиени во мексиканската држава Веракруз, а нивните тела се пронајдени покрај патот, соопштија локалните власти.

Се верува дека убиствата се резултат на конфликт кај сточарите.

Убиствата се случиле во руралниот град Лас Чоапас, близу границата со мексиканската држава Табаско.

Гувернерот на Веракруз, Квитлауак Гарсија, објави дека прелиминарната истрага сугерира дека станува збор за конфликт меѓу одгледувачи на добиток и нивните помошници од Лас Чоапаса и општина Успанапа.

Тој додаде дека меѓусебното малтретирање и закани довеле до пресметка меѓу двете групи, пренесе АП.

Оваа област е позната по активностите на криминалците.

Во последните 24 часа во Италија, 377 лица починаа од Ковид-19, а регистрирани се речиси 9.000 новозаразени со коронавирус.

Координаторот на владиниот научно-технички комитет, Агостино Миоко, тврди дека епидемиолошката состојба во Италија е под контрола, а карантинот што беше на сила во земјата за време на изминатите празници беше добар потег.

„Толку мал број новозаразени, 24 проценти помалку за една недела во споредба со претходната, не е забележан од октомври. Сепак, треба да се нагласи дека имунитетот на општеството ќе се воспостави само со масовна вакцинација“, рече Миоко.

Во моментот, вкупниот број на заразени лица во Италија е 547 илјади, од кои 20 илјади се во болница, а останатите се во домашна изолација.