Францускиот претседател, Емануел Макрон, го повика денеска неговиот италијански колега Серџо Матарела во официјална посета на Франција, соопшти Елисејската палата по тензијата помеѓу двете земји.

Повикот е испратен преку францускиот амбасадор кој денеска се врати во Италија, откако претходно на 7 февруари беше повлечен во Париз на консултации поради тоа што потпретседателите на италијанската влада, Луиџи ди Мајо и Матео Салвини, упатија критики на сметка на политиката на Макрон.

Макрон и Матарела неодамна во телефонски разговор го потврдија значењето на билатералните односи и потсетија дека Франција и Италија заедно ја изградиле Европа.

Одлуката за привремено повлекување на амбасадорот следеше по состанокот на Ди Мајо со претставници на граѓанското движење „Жолти елеци“.

Со скандирања „Спасете ја нашата планета“ илјадници ученици во Велика Британија се собраа за да побараат од британската конзервативна влада да преземе поконкретна акција во однос на климатските промени.

Демонстрантите, многумина облечени во училишните униформи, ја прескокнаа наставата и одбија да одговараат на часовите надевајќи се дека на тој начин ќе го привлечат вниманието на политичките лидери, објави агенцијата АП.

Рускиот претседател, Владимир Путин, тврди дека европските земји не сакаат да гледаат американски проектили на нивна територија, но дека нивните челници не смеат да му се спротивстават на Вашингтон, пренесува агенцијата „Тасс“.

„Дали мислите дека која било од европските земји сака американски проектили со среден дострел да бидат поставени во Европа? Никој не го сака тоа, но подобро им е да си молчат. Се прашувам каде ли е нивниот суверенитет“, изјави Путин.

Тој тврди дека Европскиот парламент донесува многу повеќе обврзувачки одлуки што се однесуваат на сите земји членки на ЕУ одошто поранешниот Врховниот совет кој своевремено носел за членките на Советскиот Сојуз.

„Целосно независни земји, едноставно не постојат“, констатира рускиот претседател.