Американскиот претседател, Џо Бајден, оваа недела ќе му испрати тешки пораки на рускиот претседател Владимир Путин, изјави денеска британскиот премиер, Борис Џонсон.

„Знам дека претседателот Бајден ќе му испрати доста тешки пораки на претседателот Путин во следните неколку дена“, рече Џонсон по пристигнувањето во Брисел на самитот на НАТО.

Џонсон исто така рече дека односите меѓу Лондон и Москва допрва треба да се подобруваат, пренесува „Ројтерс“.

„Секогаш се надевам дека работите ќе се подобрат со Русија, но се плашам дека досега беше доста разочарувачки од гледна точка на Велика Британија“, рече британскиот премиер.

Тој исто така спомена дека НАТО не сака студена војна со Кина.

„Кога станува збор за Кина, мислам дека никој во алијансата не сака да влезе во студената војна со Кина. Но, мислам дека луѓето гледаат предизвици, гледаат работи со кои треба да управуваме заедно, но исто така гледаат и можности“, рече Џонсон.

Запрашан за брегзитот и неговото влијание врз Северна Ирска, тој рече дека повеќето лидери на денешниот самит на НАТО ќе ја разберат желбата на Велика Британија да го заштити својот територијален интегритет.

Зборувајќи за можноста за соработка со Русија во обезбедувањето хуманитарна помош за земјите погодени од конфликти, американскиот претседател, Џозеф Бајден, се збуни и ги помеша Либија и Сирија, и тоа не еднаш, туку трипати.

Бајден рече дека Соединетите Американски Држави може да работат заедно со Русија во Либија, а потоа рече дека Русија со својата интервенција во Сирија загризала повеќе отколку што може да проголта, после тоа повторно спомнувајќи ја Либија во истиот контекст, наведува „Фокс њуз“.

„Сè додека тие немаат можност да воведат некаков ред во регионот, тоа не може да се направи, без да им се обезбедат основните економски потреби на луѓето. Па се надевам дека ќе најдеме начин да ги спасиме животите на луѓето, на пример, во Либија“, рече Бајден.

Претставници на Белата куќа подоцна рекоа дека тој мислел на Сирија кога ја споменал Либија, но грешката на Бајден предизвика лавина коментари на социјалните мрежи.

„Претпоставувам дека кога се бомбардираат толку многу земји одеднаш, тешко е сето тоа да се следи“, напиша либанската геополитичка коментаторка, Сара Абдалах.

Премиерот на Велика Британија, Борис Џонсон, се подготвува денес да објави дека т.н. ден на слободата ќе се одложи најмалку за две до четири недели.

Велика Британија, најверојатно, ќе го одложи укинувањето на сите мерки против пандемијата со цел да се избегнат илјадници хоспитализирани.

Владата претходно соопшти дека целосното отворање на земјата ќе биде на 21 јуни кога требаше да бидат укинати последните ограничувања, но сега се очекува сите планови да бидат одложени поради брзиот пораст на бројот на заразени со индискиот делта-вирус.

Повеќе од 90 проценти од заразените во Англија последните денови ја имаат оваа варијанта на вирусот, а здравствените работници се загрижени дека овој вид вирус е делумно отпорен на вакцината и дека е најмалку 40 проценти позаразен од другите соеви.