Американската фармацевтска компанија „Фајзер“ соопшти дека пронашла фалсификувани верзии на вакцината против Ковид-19 во Мексико и Полска.

Властите во двете земји ги запленија дозите и со тестирање потврдија дека се лажни. Вакцините пронајдени во Мексико имале лажни етикети, а дозите од Полска содржеле средства против брчки наместо вакцини, пишува Би-би-си.

Приближно 80 лица на клиника во Мексико добиле лажна верзија на вакцина што не е опасна за здравјето, но не обезбедува заштита од коронавирусот.

Портпаролот на мексиканската влада за Ковид-19, Уго Лопез-Гател, изјави дека полицијата открила лажни вакцини откога на социјалните мрежи се појавила понуда до 2.500 американски долари за доза. Неколку лица беа уапсени.

Полските власти соопштија дека откриле лажни дози во станот на осомничениот и дека никој досега не ја примил лажната вакцина.

Досега 170 милиони луѓе се вакцинирани против Ковид-19 во ЕУ, но само 30 милиони ги добиле потребните две дози. Ова го соопшти еврокомесарката за здравство, Стела Киријакидис, пред европратениците од Комитетот за животна средина, јавно здравје и безбедност на храната.

Таа изрази надеж дека набргу на ден ќе бидат вакцинирани по три милиони луѓе во ЕУ. Производството на вакцини во Унијата се зголемува и затоа ќе биде можно „Фајзер“ да испорача дополнителни 50 милиони дози порано, додаде комесарката.

Киријакидис рече дека се водат преговори за снабдување на 1,8 милијарда дози вакцини до 2023 година. На почетокот на овој месец ЕК објави дека ќе се фокусира на идните договори за снабдување со докажани технологии засновани на месенџер-РНК. Од производите одобрени од ЕУ ваквите вакцини се произведуваат само од „Фајзер“ и „Модерна“.

Тројца вработени во руската амбасада во Братислава треба да ја напуштат Словачка во рок од една недела.

„Во согласност со моментната геополитичка состојба, како и ситуацијата во Чешка, тројца вработени во руската амбасада во Братислава мора да ја напуштат територијата на Словачка во рок од седум дена“, изјави словачкиот премиер, Едуард Хегер.

Москва изрази разочараност од одлуката на Братислава навестувајќи дека бргу ќе одговори на ситуацијата.

Прага претходно протера 18 вработени во руската амбасада поради наводна улога на Русија во експлозија во магацин со оружје во 2014 година, во која загинаа две лица. Москва одговори со враќање на 20 чешки дипломати.