Ноќта помеѓу вторникот и средата засега непознати лица ги ограбиле производствениот погон и магацинот на компанијата „Маркафе“ од Кисељак во БиХ носејќи големи количини кафе.

Како што потврдиле од „Маркафе“ за порталот „Кликс“, разбојниците влегле во зградата преку прозорецот од задниот дел, каде што го паркирале комбето на оваа компанија, црвен „ситроен џампер“. Иако носивоста на комбето е 1,5 тон, разбојниците успеале да го натоварат со дури 2,5 тона кафе.

Според сопственикот, разбојниците биле добро информирани, знаеле најдобро место за влез во објектот, а потоа во канцеларијата ги барале клучевите.

И покрај новите дози вакцини и сè поголемиот број вакцинирани, експертите во Србија предупредуваат на зголемување на бројот на заразени, а кризниот штаб денеска треба до го разгледа работното време на кафулињата и рестораните не исклучувајќи ја можноста за заострување на мерките.

Во понеделникот имало речиси 3.000 заразени, а во вторникот тој број бил 3.257, со 15 смртни случаи. Според најновите резултати, денеска се забележани 3.460 новозаразени и 17 починати. Во последните 24 часа биле направени 15.200 теста.

Според „Нова.рс“, првата доза на вакцината ја примиле 813.266 граѓани на Србија, а втората доза ја примиле 462.578.

Од почетокот на епидемијата во Србија се забележани 4.366 смртни случаи како последица на Ковид-19. На респиратори се 157 лица, а во болниците има 3.727 ковид-пациенти. Од почетокот на епидемијата официјално се потврдени 442.853 случаи на инфекција.

Државниот секретар во српското Министерство за здравство најави заострување на мерките.

„Мора да обрнеме внимание и што побргу да го запреме влошувањето на ситуацијата“, рече Мирсад Џерлек.

Тој, сепак, забележува дека воведувањето полициски час не доаѓа предвид. Мерките што треба да се засилат се оние што се однесуваат на работното време на продавниците и кафулињата.

Претседателот Владимир Путин ѝ нареди на водечката агенција за контраразузнавање, Федералната служба за безбедност, да ја зајакне борбата против, како што рече, обидите на Западот да ја дестабилизира Русија.

На состанокот со највисоките претставници на Федералната служба за безбедност, Путин укажа на т.н. политика на ограничување во Русија, што, од друга страна, значи „спречување на развојот на Русија, создавање проблеми по должината на границите, предизвикување внатрешна нестабилност и поткопување на вредностите што го обединуваат руското општество“.

Путин не ги спомена протестите за апсењето на опозицискиот лидер Алексеј Навални, но ги нападна оние во Русија што наводно им служат на странските интереси.

„Неопходно е да се постави граница помеѓу политичката конкуренциј, конкуренцијата помеѓу политичките партии, идеолошките платформи, разните ставови за развојот на земјата и активностите во служба на странските интереси, кои немаат никаква врска со демократијата и имаат цел да ги нарушат стабилноста и безбедноста на нашата земја“, рече Путин.

Претседателот ја истакна потребата Федералната служба да ги заштити од провокации парламентарните избори закажани за септември.

Тој ја поздрави работата на службата за спречување на активностите на странски шпиони велејќи дека биле откриени 72 и 423 нивни информатори.