На Норвешка ѝ треба повеќе време да процени дали да продолжи да ја користи вакцината на „Астразенека“ или да ја исклучи од програмата за вакцинација, изјави денеска министерот за здравство, Бент Хеј.

Норвешкиот Институт за јавно здравје препорача да се прекине употребата на вакцината на „Астразенека“, но на владата ѝ требаат повеќе информации пред да донесе конечна одлука.

Властите ја прекинаа вакцинацијата со оваа вакцина на 11 март откако мал број вакцинирани млади беа хоспитализирани поради комбинација на згрутчување на крвта, крвавење и ниско ниво на тромбоцити, а некои од нив починаа.

„Владата верува дека нема доволно добра основа да постигнеме конечен заклучок дека вакцината треба да се отстрани од норвешката програма за вакцинирање во овој момент“, рече Хеј.

Тој додаде дека владата ќе назначи комисија за понатамошно анализирање на сите достапни податоци и до 10 мај ќе достави извештај.

Шефицата на Агенцијата за лекови на Данска, Тања Ерихсен, се онесвести на прес-конференција на која ја соопшти одлуката дека нејзината земја веќе нема да ја користи вакцината на „Астразенека“.

Ерихсен се струполи на земја одеднаш. Таа била пренесена во болница, а данските медиуми информираа дека сега се чувствува добро.

Данска вчера стана првата европска земја која објави дека веќе нема да ја дава вакцината на „Астразенека“.

Четири лица во Италија починаа од ретки тромби, откако беа вакцинирани со вакцината на „Астразенека“, се вели во извештајот на националната фармацевтска агенција АИФА објавен денес.

Според извештајот на АИФА, различни несакани ефекти биле потврдени кај 0,5 проценти од 9 милиони дози инјектирани помеѓу 24 декември и 26 март со употреба на вакцини од три производители – „Фајзер“, „Астразенека“ и „Модерна“.

Тешки несакани ефекти биле потврдени во 0,04 проценти од случаите. Лесните несакани ефекти најчесто биле симптоми на грип, болка на местото на убодот и замор.

Како и многу европски земји и Италија накратко ја прекина вакцинацијата со вакцината на „Астразенека“ во март кога се појави загриженост за појава на тромби. Оттогаш, со оваа вакцина во Италија се вакцинираат само луѓето постари од 60 години, бидејќи европските регулатори заклучија дека придобивките од вакцинацијата се многу поголеми од ризиците.

Во Италија 11 лица развија тромби, откако примија вакцина на „Асразенека“, а четири починаа.