Кинеските власти ја критикуваа и одговорија на изјавата на американскиот претседател Џо Бајден, кој рече дека Соединетите Американски Држави ќе го бранат Тајван доколку е потребно во случај на нивен конфликт со Кина.

Портпаролот на кинеското Министерство за надворешни работи, Ванг Венбин, ги коментира изјавите на Бајден, јавија агенциите.

„Тајван е нераскинлив дел од Кина. Странската интервенција е неприфатлива кога станува збор за Тајван“, рече Венбин.

Тој исто така рече дека Кина одлучно ги брани своите интереси и нема да отстапи од нив.

„Никој да не се обидува да ги тестира решителноста и капацитетот на Кина да ги брани својот суверенитет и територијалниот интегритет“, рече тој.

Истовремено, ги повика САД да го почитуваат принципот на интегритет на Кина и да им не даваат погрешни сигнали на сепаратистичките кругови во Тајван.

Поранешниот американски претседател Барак Обама им се придружи на европските лидери во чест на германската канцеларка во заминување Ангела Меркел заблагодарувајќи ѝ се што е „котва во многуте бури“.

Во видеопораката прикажана на нејзиниот последен самит на ЕУ, Обама рече: „Вашите сакани луѓе и целиот свет ви должат голема благодарност што бевте светилник толку многу години“.

"Thanks to you, the centre has held through many storms." @BarackObama addresses a few words to Chancellor Merkel as we are saying goodbye to her in the European Council #EUCO pic.twitter.com/FIUpCPkloW

— Charles Michel (@eucopresident) October 22, 2021

Поранешниот американски претседател особено ја пофали нејзината способност да ги стави принципите над себичните интереси алудирајќи на нејзиниот релативно либерален став за време на големиот бегалски бран во 2015 година.

Тој ѝ се заблагодари на канцеларката за нејзината лојалност кон универзалните вредности што ги усвои како девојка во Источна Германија.

Dankeschön, рече Обама.

Европската Унија нема да финансира боцкави жици и огради на границата за да го спречи доаѓањето на мигрантите, како што бараат дванаесет земји, вклучувајќи ги Литванија и Австрија, изјави претседателката на Европската комисија, Урсула фон дер Лаен.

„Бев многу јасна дека Комисијата и Парламентот веќе подолго време се согласуваат дека нема да финансираат боцкави жици и огради, рече таа по самитот на 27 земји во Брисел, на кој се дискутира за ова прашање.

Литванија гради ограда од боцкава жица по должината на границата со Белорусија за да го запре бранот мигранти за чие оркестрирано доаѓање го обвинува белорускиот претседател Александар Лукашенко.

Литванскиот претседател, Гитанас Наузеда, во Брисел рече дека таквите мерки се неопходни на краток рок за управување со кризата.

Ако Литванија изгради ограда, може да смета на нашата солидарност. Не е на Литванците сами да ја финансираат, оцени новиот австриски канцелар Александар Шаленберг, пренесоа агенциите.

Министрите за внатрешни работи на 12 земји (Австрија, Бугарија, Кипар, Данска, Естонија, Грција, Унгарија, Литванија, Латвија, Полска, Чешка и Словачка) напишаа писмо до Комисијата на 7 октомври барајќи од ЕУ да ја финансира изградбата на такви бариери.

„Физичката бариера е еден вид ефективна мерка за заштита на границите, која им служи на интересите на целата Унија, а не само на земјите членки на првата линија“, велат тие.

Комесарката за внатрешни работи, Илва Јохансон, рече дека земјите имаат можност и право да градат огради, но кога станува збор за европското финансирање, „тоа е друга работа“.

Полска, Латвија и Литванија почнаа да градат ограда од боцкава жица на дел од границата со Белорусија.

Унгарија подигна ограда на границата со Србија и Хрватска за време на мигрантската криза во 2015 година, а Словенија го направи истото тоа со Хрватска.