Еден од најпознатите светски тенори, италијанскиот оперски пејач Андреа Бочели, ќе пее на Велигден во празната катедрала „Дуомо“ во Милано, а концертот, според најавата, треба да биде симбол на љубовта, заедништвото и заздравување во ерата на коронавирусот и ќе се пренесува преку интернет.

Бочели ќе го придружува само катедралниот оргулист Емануеле Вијанели и заедно ќе изведат дела од сакрална музика, вклучувајќи ја и „Санта Марија“ од Пјетро Маскањи.

Концертот ќе се емитува на јутјуб-каналот на Бочели.

„Чест и задоволство ми е што бев поканет од Градот и од катедралата. Верувам во моќта на групната молитва, верувам во Велигден, универзален симбол на повторното раѓање, што сега ни е потребно на сите, и на верниците и на оние што тоа не се“, рече славниот тенор.

Италија сè уште има најголем број смртни случаи на коронавирус, повеќе од 17.000, а особено тешко беше погодена Ломбардија, регионот чиј главен град е Милано.

„Оваа година Велигден ќе биде поинаков од вообичаеното. Сигурен сум дека извонредниот глас на Бочели ќе може да го загрее срцето на Милано, Италија и на светот“, рече градоначалникот Џузепе Сала.

Премиерот на Велика Британија и понатаму останува на интензивна нега. Неговата состојба се подобрува, може да седи на кревет, изјави министерот за финансии, Риши Сунак.

„Најновите информации се дека премиерот останува на интензивна нега во болница, а неговата состојба се подобрува“, рекол Сунак, пренесе „Ројтерс“.

„Можам и да ви кажам дека седеше на кревет и дека соработува со медицинскиот тим“, додал тој.

Претходно, портпаролот на Џонсон рече дека тој реагира добро на терапијата што ја прима во болницата „Сент Томас“ и додал дека е добро расположен.

Џонсон на 27 март објави дека има коронавирус и дека имал благи симтоми. Пред два дена тој беше пренесен во болница.

Во Велика Британија во последните 24 часа од коронавирус починаа 938 луѓе, што е рекорден број на смртни случаи во оваа земја од почетокот на епидемијата.

Досега во Британија од Ковид-19 починале 7.097 луѓе.

Досега се тестирани се 232.208 пациенти, од кои позитивни се 60.733.