Федералните обвинители на САД во поднесокот до судот тврдат дека толпата што упадна во зградата на Капитол сакала да ги фати и убие избраните пратеници, пренесува „Гардијан“.

Тужителите ја направија таа процена во поднесокот до судот со кој се бараше притвор за Џејкоб Ченсли, снимен во зградата на Капитол со рогови на главата.

Барањето за притвор, напишано од обвинителите во Аризона, детаљно наведува што направил Ченсли во Капитол. Меѓу другото, се наведува дека тој му оставил порака на потпретседателот на САД, Мајк Пенс, во која гласи: „Правдата доаѓа, прашање на време е“.

„Силните докази, кои ги вклучуваат зборовите и постапките на Ченсли во Капитол, ја поддржуваат тезата дека демонстрантите сакале да ги фатат и убијат избраните американски службеници“, се вели во поднесокот.

Чансли треба да се појави на суд в понеделник, а неговиот полномошник по службена должност не даде коментар за поднесокот.

Обвинителите и федералните агенти поведуваат посериозни обвиненија за насилство во Капитол, пишува „Гардијан“ повикувајќи се на примерот на пензионираниот пожарникар Роберт Санфорд, кој фрлил апарат за гаснење пожар во главата на еден од полицајците, и Питер Стагер, кој е обвинет за удирање друг офицер со стап, на кој имало американско знаме.

Турскиот претседател Реџеп Таип Ердоган денеска ги критикуваше СAД за исфрлањето на неговата земја од програмата за борбени авиони Ф-35.

Исфрлањето се случи откако Анкара го купи рускиот систем за противракетна одбрана С-400.

Ердоган изрази надеж дека, кога станува збор за улогата на Турција во програмата Ф-35, ќе бидат преземени позитивни чекори кога новоизбраниот претседател Џо Бајден ќе ја преземе функцијата.

Тој истакна дека Турција платила сериозна сума пари за авионите Ф-35.

„Ова е многу сериозна грешка што Америка, како сојузничка држава, ја направи кон нас“, рече Ердоган.

Тој додаде дека ниту една земја не може да одлучува за чекорите што ќе ги преземе Турција во врска со одбранбената индустрија.

Во врска со најавата дека Унгарија, поради бавната испорака на европски вакцини, размислува за увоз на лесно достапни кинески вакцини, Брисел вели дека нема потреба за билатерална набавка на дополнителни вакцини и дека не се преговара со Кина на ниво на ЕУ.

„ЕУ обезбеди 2,3 милијарди дози потенцијални вакцини, а само од компаниите ‘Фајзер’ и ‘Модерна’ нарачавме вакцини за 80 проценти од населението во ЕУ, и тие веќе се користат“, изјави портпаролот на Европската комисија, Дана Спинат.

Европската комисија наведува дека само од компаниите „Фајзер“ и „Модерна“ се нарачани 760 милиони дози (600 милиони и 160 милиони) и дека наскоро ќе пристигнат и други вакцини.

„Затоа, нема потреба од какви било билатерални договори за дополнителни дози над оние што ги договори ЕК за потребите на сите земји членки“, рече Комисијата.