Косовскиот премиер, Албин Курти, се состана со шефицата на грчката канцеларија за врски во Приштина, Крисоула Алифери, и побара од нејзината земја да се приклучи на блокот на земји што го признаа Косово.

Во соопштението на косовската влада се вели дека Курти побарал билатералната соработка дополнително да се проширува и продлабочува и Грција да се приклучи на блокот земји што го признале Косово.

Курти ги пофалил односите со Грција и нејзината посветеност за членството на Косово во меѓународните организации, како што беше случајот со членството во ЕБОР.

Грчкиот амбасадор во Србија, Јоргос Јакофотакис, вчера рече дека ставот на неговата земја да не ја признава независноста на Косово е добро познат и останува непроменет.

Амбасадорот ги коментираше очекувањата на аналитичарите за надворешна политика Дејвид Филипс и Даниел Сервер дека Грција ќе ја смени својата позиција и веројатно ќе го признае Косово.

Филипс и Сервер изјавија дека не очекуваат петте земји од Европската унија што не го признаа Косово да ја сменат својата позиција, освен Грција.

Во последните 24 часа во Србија се регистрирани 2.971 случај на коронавирус, а 35 лица починаа.

Направени се 14.565 тестови.

Досега во Србија се регистрирани 654.870 случаи на коронавирус, а починале 5.881 лице.

Србија надмина три милиони дадени дози на вакцини.

„Наскоро ќе имаме над 1,8 милиони вакцинирани луѓе со две дози“, рече денеска претседателот на Србија, Александар Вучиќ.

Кога се во прашање епидемиолошките мерки, новата седница на кризниот штаб е закажана за утре во 8 часот.

Ќе се разговара за можно ново ублажување на мерките. Исто така, се очекува конечна одлука за враќање на учениците во училиште, по еден месец настава на интернет.

Меѓународната организација за миграција (ИОМ) го опиша Јемен како опасно место за заглавените мигранти и повика да им помогне безбедно да се вратат во своите домови, пренесува „Мидл Ист монитор“.

„Јемен е опасно место за заглавените мигранти. Да им помогнеме безбедно да се вратат дома е хуманитарен императив”, објави ИОМ на Твитер.

ИОМ додаде дека во вторникот го организирале вториот повратен лет од Аден до Адис Абеба од почетокот на пандемијата на коронавирус, помагајќи им на 160 заглавени мигранти достоинствено да се вратат дома.

Претходно во понеделникот, организацијата објави дека дури 34 мигранти загинале крај брегот на Џибути откако нивниот брод се превртел. Мигрантите ги превезувале шверцери со луѓе.

Според организацијата, ова е втора трагедија од ваков вид за нешто повеќе од еден месец, бидејќи во март 20 лица загинаа, а неколку други беа повредени. На почетокот на март, милицијата Хути запали притвор за имигранти во главниот град Сана, убивајќи и ранувајќи околу 900 лица.