Германскиот канцелар Олаф Шолц денеска изјави дека не ја исклучува можноста за измена на договорот за Европската Унија, договорот од Мастрихт.

Неговата изјава дојде во време на обновена дебата за можните промени во начинот на кој функционира ЕУ, делумно поттикната од конференцијата за иднината на Европа, која предложи подлабока интеграција, вклучително и укинување на националното вето.

Ова го поттикна Европскиот парламент да повика на ревизија на неколку договори на Европската Унија, иако идејата долго време предизвика сомнеж кај многу членки на ЕУ, кои веруваат дека тоа не е неопходно и би го оттргнало вниманието од поважни прашања.

Доколку е потребно, можеме да разговараме за измена на неколку договори, вклучувајќи го и договорот за ЕУ, што не е табу, рече Шолц во Бундестагот.

Но, нагласи дека за такво нешто ќе треба најголем можен консензус бидејќи во овој момент најмалку се потребни полемики за институционалните прашања.

По одлуката на Унгарија да ја блокира забраната за купување руска нафта, минатата недела многу се зборуваше за тоа дали ЕУ треба да ја укине одлуката за вето за надворешната политика.

Некои лидери на ЕУ поддржуваат укинување на ветото за некои прашања и промена на договорот, но далеку од јасно е дали тие би се договориле за тоа кои одлуки може да се усвојат со мнозинство гласови и кои елементи од договорот треба да се променат, пишува „Политико“.

Шолц денеска оцени дека мнозинството гласови е една од идеите чија цел е ЕУ да биде поефикасна и посочи дека е среќен што сè повеќе луѓе ја следат.

Некои членки на ЕУ веќе се изјаснија против промена на договорот за ЕУ, а на почетокот на мај, 13 земји, вклучително и балтичките и скандинавските, изјавија дека не ги поддржуваат несоодветните и предвремени обиди за почнување на процесот за промена на договорот, пренесуваат медиумите.

Италијанскиот премиер Марио Драги, денеска, повика на итен прекин на огнот во Украина за да се овозможат преговори.

„Мора да се постигне прекин на огнот што е можно побргу“, рече Драги во обраќањето пред Сенатот, горниот дом на италијанскиот парламент, отворајќи дебата за улогата на Италија во поддршката на Украина, која создава растечки тензии во владејачкото мнозинство.

Премиерот Марио Драги наведува дека е важно да се задржи притисокот врз Русија преку економски санкции бидејќи Москва мора да биде доведена на преговарачка маса, пренесе „Танјуг“.

Целосната руска агресија против Украина доведе до пресвртница за Шведска да одлучи да аплицира за членство во НАТО, изјави шведската премиерка Магдалена Андерсон (Андерсон) во Роуз Гарден.

„Мојата влада дојде до заклучок дека безбедноста на шведскиот народ најдобро ќе биде заштитена во рамките на НАТО, а тоа е поддржано со многу широка поддршка во шведскиот парламент“, рече Андерсон стоејќи до американскиот претседател Џо Бајден и финскиот претседател.

Таа посочи дека НАТО ќе биде посилен со Шведска и Финска како членки.

„Ние сме обезбедувачи на безбедност со софистицирани одбранбени способности. А ние сме шампиони на слободата, демократијата и човековите права. Имаме долга традиција на обемна воена соработка со НАТО вклучувајќи ги сите мисии. И токму сега ги зголемуваме трошоците за одбрана и што побргу ќе достигнеме 2 отсто од БДП“, додаде таа.

Андерсон поддршката на САД за членството на Шведска во НАТО ја нарече фундаментална, но рече дека со нетрпение очекува дијалог со Турција за да ги реши нејзините грижи, пренесуваат медиумите.