Директорот на сојузната Криминалистичка служба на Австрија предупредува дека организирани криминални банди од Балканот и Источна Европа веќе се подготвуваат за отворањето на границите.

Генералот Андреас Холцер, поранешен шеф на специјалната единица што се занимаваше со корупциската афера „Ибица“, во интервју за виенскиот дневен весник „Кронен цајтунг“ посочува дека фокусот на неговата работа ќе биде борбата против компјутерскиот криминал.

Тој најави двојно зголемување на службениците во специјализираното одделение што ќе се занимава со гонење на компјутерски криминал.

„Добрата истрага е уметност. Покрај вообичаените активности, како што се тајна истрага и набљудување, сакам да ја вклучам стручноста на науката и помошта на надворешни експерти од универзитетите”, нагласи Холцер.

Кога станува збор за моменталната безбедносна состојба во Австрија, тој вели дека пандемијата и добрата полициска работа го запреле криминалот против имотот.

„Сепак, организираните банди од Балканот и Источна Европа веќе се подготвуваат за отворање на границите и за ‘афтер корона забава’“, подвлече Холцер.

Фризерите ширум Германија од денес ги отвораат салоните денес по двомесечна забрана, што е уште еден претпазлив чекор кон отворање на државата која сака да ги олесни мерките, но истовремено е загрижена за многу заразните видови на коронавирусот.

Претходно, учениците од основните училишта се вратија на своите клупи пред една недела, а канцеларката Ангела Меркел и премиерите на 16 покраини в среда повторно ќе се состанат за да одлучат во која насока ќе одат ограничувачките мерки, објави АП.

Некои провинции веќе дозволија да се отворат продавници, како што се цвеќарници и продавници за компјутерска опрема.

Повеќето продавници се затворени од 16 декември, а рестораните, кафулињата, спортските објекти и спортските сали се затворени од 2 ноември.

Унгарскиот премиер Виктор Орбан се заканува дека ќе ја повлече владејачката партија „Фидес“ од конзервативниот блок на Европската народна партија (ЕПП) во Европскиот парламент, е заклучокот од писмо објавено во неделата.

Орбан во писмото му се обраќа на Манфред Вебер, германски политичар кој ја предводи парламентарната група на ЕПП, дека „Фидес“ ќе си замине доколку конзервативниот блок донесе одлука за промена на регулативата, што беше предложено во петокот.

Предложените измени ќе овозможат одредена група да биде суспендирана или исклучена од блокот на ЕПП со само 50 отсто од гласовите во некои случаи.

Потпретседателката на „Фидес“, Каталин Новак, го објави писмото на „Твитер“.

ЕПП, во која се наоѓа и конзервативниот блок на германската канцеларка Ангела Меркел, веќе неколку години е во кавга со „Фидес“.

Членството на „Фидес“ во ЕПП е суспендирано од 2018 година поради евроскептичната политика на Орбан, но тоа не важи за групата на ЕПП во Европскиот парламент на која „Фидес“ сè уште припаѓа.

Тоа може да се промени по гласањето во среда, кога ќе се одлучува за внатрешните прописи.

Суспензија може да се случи во следните недели, освен ако „Фидес“ не се повлече претходно.

„Промената на регулативата ќе доведе до правно сомнителна суспензија на нашите избрани претставници во групата на ЕПП“, вели Орбан.

„Ако ‘Фидес’ не е добредојдеан, тогаш не се чувствуваме должни да останеме во групата“, додава унгарскиот премиер.