До денес Кина им даде повеќе од 15 милиони дози вакцини на своите граѓани, изјави Ванг Бин, официјален претставник на Националната здравствена комисија, како што објави „Ројтерс“.

Кина е водечка земја во светот според бројот на вакцинации, пред Велика Британија и САД.

Досега во САД се вакцинирани 13 милиони луѓе, кои примиле една или две дози.

Од денес, Индија, еден од водечките светски производители на лекови, ќе почне да ја дистрибуира вакцината против коронавирусот на шест соседни земји.

Првите резерви на вакцини во рамките на програмата за неповратна помош ќе бидат испратени во Бутан, Малдиви, Бангладеш, Непал, Мјанмар и на Сејшелите, потврди Министерството за надворешни работи.

Вакцината доаѓа како дел од програмата за помош, што значи дека тие земји нема да мора да плаќаат за неа.

Индиската агенција за лекови издаде итно одобрување за употреба на две вакцини против Ковид-19. Зелено светло доби вакцината на Универзитетот во Оксфорд и фармацевтската компанија „Астра зенека“, како и вакцината од индиската компанија „Бхает биотех“.

Индија во саботата почна програма за вакцинација на речиси 300 милиони луѓе.

Претседателката на Европската комисија, Урсула фон дер Лаен, по повод инаугурацијата на Џозеф Бајден за нов претседател на САД, оценува дека ЕУ, по четири долги години, повторно има партнер во САД.

„Новата зора во Америка се чекаше долго време“, рече Фон дер Лаен.

Говорејќи пред Европскиот парламент, претседателоката на Европската комисија истакна дека САД се најстариот и најдоверливиот партнер на ЕУ и дека ЕУ и САД мора да работат заедно и да бидат лидери во светот.

Фон дер Лаен рече дека борбата против пандемијата на Ковид-19 е приоритетна заедничка борба и дека очекува САД, предводени од Бајден, да се вратат на Парискиот климатски договор.

„САД се враќаат, а ЕУ е подготвена да му верува на стариот партнер и да вдахне нов живот во надежта за скапоцено партнерство“, заклучи Фон дер Лаен.